બકરીઇદ: રાષ્ટ્રપતિ અને PM મોદીએ દેશવાસીઓને પાઠવી શુભેચ્છાઓ, શ્રદ્ધાપૂર્વક મનાવવામાં આવી રહ્યો છે તહેવાર, સુરક્ષા ચુસ્ત

ઈદ-ઉલ-અઝહા (બકરીઇદ)નો તહેવાર ગુરુવારે દેશભરમાં ખૂબ જ શ્રદ્ધા અને ઉત્સાહ સાથે મનાવવામાં આવી રહ્યો છે. આ નિમિત્તે અલગ-અલગ સ્થળોએ ઈદની નમાજ અદા કરવામાં આવી હતી, જેમાં દેશમાં શાંતિ, સમૃદ્ધિ અને ભાઈચારો જળવાઈ રહે તે માટે વિશેષ દુઆઓ માંગવામાં આવી હતી.

બકરીઇદના અવસર પર દિલ્હી અને ગૌતમબુદ્ધ નગર (નોઈડા) સહિતના વિસ્તારોમાં સુરક્ષાની વ્યાપક વ્યવસ્થા કરવામાં આવી છે. શાંતિપૂર્ણ વાતાવરણ જળવાઈ રહે તે માટે પોલીસે પૂરતી તૈયારીઓ કરી લીધી છે. દિલ્હી પોલીસે ખાસ કરીને સેન્ટ્રલ ડિસ્ટ્રિક્ટમાં સુરક્ષા વ્યવસ્થા મજબૂત કરી છે. જોઈન્ટ પોલીસ કમિશનર મધુર વર્માએ જણાવ્યું કે, તહેવાર પહેલા જ સંવેદનશીલ વિસ્તારોમાં રૂટ માર્ચ અને ફ્લેગ માર્ચ કરવામાં આવી હતી.

રાષ્ટ્રપતિ દ્રૌપદી મુર્મુએ દેશવાસીઓને શુભેચ્છાઓ પાઠવી

રાષ્ટ્રપતિ દ્રૌપદી મુર્મુએ સોશિયલ મીડિયા પ્લેટફોર્મ ‘X’ પર લખ્યું:

“ઈદ-ઉલ-ઝુહાના પાવન અવસર પર હું તમામ દેશવાસીઓને, ખાસ કરીને મુસ્લિમ ભાઈ-બહેનોને હાર્દિક શુભેચ્છાઓ પાઠવું છું. આ તહેવાર સમર્પણ, ત્યાગ અને બલિદાનનું પ્રતીક છે. આ પર્વ આપણને માનવતાની, ખાસ કરીને વંચિત વર્ગોની સેવા કરવાની પ્રેરણા આપે છે. આવો, આ અવસરે આપણે સમાજમાં પ્રેમ અને સંવાદિતા વધારવા માટે વધુ પ્રતિબદ્ધતા સાથે આગળ વધીએ.”

પીએમ મોદીએ આપ્યો આ સંદેશ

વડાપ્રધાન નરેન્દ્ર મોદીએ ‘X’ પર દેશવાસીઓને શુભેચ્છા પાઠવતા લખ્યું:

“ઈદ-ઉલ-અઝહાની હાર્દિક શુભેચ્છાઓ! ઈશ્વર કરે આ અવસર આપણા સમાજમાં ભાઈચારો અને ખુશીઓની ભાવનાને વધુ ગાઢ બનાવે. દરેકના સારા સ્વાસ્થ્ય અને સફળતા માટે પ્રાર્થના.”

દિલ્હી: બકરીઇદ પર દિલ્હી પોલીસની કડક સુરક્ષા

દિલ્હી પોલીસે બકરીઇદને ધ્યાનમાં રાખીને સેન્ટ્રલ ડિસ્ટ્રિક્ટમાં ચુસ્ત સુરક્ષા બંદોબસ્ત ગોઠવ્યો છે. જોઈન્ટ પોલીસ કમિશનર મધુર વર્માએ માહિતી આપી હતી કે પોલીસ દ્વારા અગાઉથી જ રૂટ માર્ચ અને ફ્લેગ માર્ચ કરવામાં આવી હતી, જેના કારણે અત્યાર સુધી તહેવાર સંપૂર્ણપણે શાંતિપૂર્ણ રહ્યો છે. આ સાથે જ કુરબાની ઘરોની અંદર જ કરવામાં આવશે તેવું સુનિશ્ચિત કરાયું છે.

ગૌતમબુદ્ધ નગર: નોઈડામાં સુરક્ષા વ્યવસ્થા સજ્જ

ગૌતમબુદ્ધ નગરની ૧૮૦થી વધુ મસ્જિદોમાં ઈદની નમાજ અદા કરવામાં આવી રહી છે. જોઈન્ટ પોલીસ કમિશનર રાજીવ નારાયણ મિશ્રાએ કડક સુરક્ષા વ્યવસ્થા અંગે જણાવ્યું કે, ત્રણેય ઝોનમાં સિવિલ પોલીસ અને PAC (પબ્લિક આર્મ્ડ કોન્સ્ટેબલરી) ફોર્સ તૈનાત કરવામાં આવી છે. કંટ્રોલ રૂમ અને સોશિયલ મીડિયા દ્વારા પણ સતત દેખરેખ રાખવામાં આવી રહી છે જેથી કાયદો અને વ્યવસ્થાની સ્થિતિ બગડે નહીં.