અમદાવાદમાં ‘મેલોડી’ જેવી દેખાતી ‘માય ડેડી’ ચોકલેટ પર પ્રતિબંધ

અમદાવાદમાં બનાવાતી ‘માય ડેડી’ નામની ચોકલેટ હવે કાનૂની વિવાદમાં સપડાઈ છે. જાણીતી બિસ્કિટ અને કન્ફેક્શનરી કંપની Parle Products એ આ ચોકલેટ પર ટ્રેડમાર્ક ઉલ્લંઘનનો આરોપ લગાવી કોર્ટનો દરવાજો ખટખટાવ્યો હતો. કંપનીનો આક્ષેપ હતો કે ‘માય ડેડી’ ચોકલેટનું રેપર, ડિઝાઇન અને પ્રેઝન્ટેશન તેમની લોકપ્રિય ‘મેલોડી’ ચોકલેટ સાથે ખુબ જ મળતું આવે છે. જેના કારણે ગ્રાહકોમાં ગેરસમજ ફેલાઈ શકે છે.

કોર્ટમાં થયેલી સુનાવણી બાદ અમદાવાદમાં આ ચોકલેટના ઉત્પાદન, વેચાણ અને જાહેરાત પર તાત્કાલિક પ્રતિબંધ મૂકવાનો આદેશ આપવામાં આવ્યો છે. કોર્ટએ પ્રાથમિક રીતે માન્યું કે બંને ચોકલેટના પેકેજિંગમાં નોંધપાત્ર સમાનતા જોવા મળે છે અને તે ટ્રેડમાર્ક કાયદાના ભંગ સમાન બની શકે છે.

‘મેલોડી’ ચોકલેટ છેલ્લા કેટલાક સમયથી ફરી ચર્ચામાં આવી હતી. ખાસ કરીને ભારતના વડાપ્રધાન Narendra Modi દ્વારા ઇટાલીની વડાપ્રધાન Giorgia Meloni ને ‘મેલોડી’ ચોકલેટ ભેટ આપવામાં આવી હોવાની ચર્ચા સોશિયલ મીડિયા પર વાયરલ બની હતી. ત્યારબાદ ‘મેલોડી’ બ્રાન્ડ ફરી લોકચર્ચામાં આવી અને તેની લોકપ્રિયતા વધતી જોવા મળી હતી.

કાયદાકીય નિષ્ણાતોના મતે, જાણીતી બ્રાન્ડની નકલ જેવી દેખાતી પ્રોડક્ટ બજારમાં મૂકવી ટ્રેડમાર્ક અને બ્રાન્ડ ઓળખ માટે ગંભીર મુદ્દો બની શકે છે. આ કેસ બાદ FMCG ક્ષેત્રમાં બ્રાન્ડ સુરક્ષા અને બૌદ્ધિક સંપત્તિના મુદ્દાઓ ફરી ચર્ચાના કેન્દ્રમાં આવ્યા છે.