પાડોશી રાજ્ય મહારાષ્ટ્રમાં બર્ડ ફ્લૂ (એવિયન ઈન્ફલ્યુએન્ઝા) ના કેસોમાં નોંધપાત્ર વધારો થતાં ગુજરાત સરકાર સતર્ક બની છે. આ જીવલેણ વાયરસ ગુજરાતની સરહદમાં પ્રવેશે નહીં તે માટે રાજ્યના પશુપાલન વિભાગ દ્વારા સત્તાવાર રીતે ‘હાઈ એલર્ટ‘ જાહેર કરવામાં આવ્યું છે. તંત્ર દ્વારા તમામ જિલ્લાઓમાં આવેલા પોલ્ટ્રી ફાર્મ્સમાં યુદ્ધના ધોરણે સરવે અને મોનિટરિંગની કામગીરી હાથ ધરવામાં આવી છે.
આ પણ વાંચો…
થિરૂવન્તપુરમથી દિલ્હી સુધી મંથન: વેણુગોપાલ, સતીશન કે ચેન્નીથલા? કેરળના ‘કેપ્ટન’ કોણ?
સીમાવર્તી વિસ્તારોમાં કડક દેખરેખ
મહારાષ્ટ્રમાં સંક્રમણ અટકાવવા માટે હજારો પક્ષીઓનો નાશ (Culling) કરવામાં આવ્યો છે. આ સ્થિતિને ગંભીરતાથી લઈને ગુજરાતના દક્ષિણ સરહદી જિલ્લાઓમાં વિશેષ તકેદારી રાખવામાં આવી રહી છે:
-
સઘન ચેકિંગ: દરેક જિલ્લામાં કલેક્ટર અને જિલ્લા વિકાસ અધિકારી (DDO) ના સીધા માર્ગદર્શન હેઠળ વિશેષ ટીમો તૈનાત કરવામાં આવી છે.
-
નિરીક્ષણ: પશુપાલન વિભાગની ટીમો પોલ્ટ્રી ફાર્મ અને પક્ષીઓના આશ્રયસ્થાનોની સતત મુલાકાત લઈ રહી છે.
-
બોર્ડર એલર્ટ: મહારાષ્ટ્રની સરહદને અડીને આવેલા વિસ્તારોમાં વાહનો અને પક્ષીઓની અવરજવર પર ચાંપતી નજર રાખવામાં આવી રહી છે.
પશુપાલન વિભાગની નાગરિકોને મહત્વપૂર્ણ અપીલ
બર્ડ ફ્લૂના જોખમને ટાળવા માટે વિભાગ દ્વારા જાહેર જનતા માટે વિશેષ માર્ગદર્શિકા (Advisory) જાહેર કરવામાં આવી છે:
-
આહારમાં સાવધાની: ચિકન કે ઈંડાનો ઉપયોગ કરનારા લોકોએ તેને ઊંચા તાપમાને બરાબર રાંધીને જ ખાવા જોઈએ. કાચું કે અધકચરું માંસ સ્વાસ્થ્ય માટે જોખમી બની શકે છે.
-
શંકાસ્પદ મૃત્યુની જાણ: જો કોઈ વિસ્તારમાં અચાનક મોટી સંખ્યામાં કાગડા, કબૂતર, મરઘાં કે અન્ય પક્ષીઓ મૃત અવસ્થામાં મળી આવે, તો તેને અડકવું નહીં.
-
તત્કાલ સંપર્ક: પક્ષીઓના અકુદરતી મૃત્યુના કિસ્સામાં તુરંત જ નજીકના સરકારી પશુ દવાખાના અથવા હેલ્પલાઈન પર જાણ કરવી.
