અમદાવાદ: જાણીતા વેધર એનાલિસ્ટ અશોકભાઈ પટેલે 1થી 8 જુલાઈ દરમિયાન ગુજરાતના હવામાન અંગે મહત્વપૂર્ણ આગાહી જાહેર કરી છે. તેમના જણાવ્યા મુજબ આગામી સપ્તાહ દરમિયાન દક્ષિણ ગુજરાત બાદ હવે સૌરાષ્ટ્ર અને કચ્છમાં પણ ચોમાસું આગળ વધશે, જ્યારે ગુજરાત રીજનમાં વરસાદનું પ્રમાણ વધુ રહેવાની સંભાવના છે.
અશોકભાઈ પટેલના જણાવ્યા અનુસાર આગામી દિવસોમાં દક્ષિણપશ્ચિમ ચોમાસું રાજ્યના બાકીના વિસ્તારોમાં આગળ વધશે અને સપ્તાહના અંત સુધીમાં સમગ્ર સૌરાષ્ટ્ર-કચ્છને પણ આવરી લે તેવી સ્થિતિ સર્જાઈ શકે છે.
તેમણે જણાવ્યું કે ગુજરાત રીજનમાં આગાહી દરમિયાન ઘણા વિસ્તારોમાં હળવાથી મધ્યમ વરસાદ પડશે, જ્યારે એકાદ-બે દિવસ ભારેથી અતિભારે વરસાદની પણ શક્યતા છે. કેટલાક વિસ્તારોમાં ગાજવીજ, વીજળીના કડાકા અને 40થી 50 કિમી પ્રતિ કલાકની ઝડપે પવન ફૂંકાઈ શકે છે.
વરસાદના વિતરણ અંગે તેમણે જણાવ્યું કે આશરે 25 ટકા વિસ્તારોમાં 25 મીમી સુધી, 50 ટકા વિસ્તારોમાં 25થી 75 મીમી અને બાકીના 25 ટકા વિસ્તારોમાં 75 મીમીથી વધુ વરસાદ નોંધાઈ શકે છે. કેટલાક કેન્દ્રોમાં 150 મીમીથી વધુ વરસાદ પણ પડી શકે છે.
સૌરાષ્ટ્ર અને કચ્છમાં પણ આગામી સપ્તાહ દરમિયાન છૂટાછવાયા હળવાથી મધ્યમ વરસાદની શક્યતા છે. એકાદ-બે દિવસ ભારે વરસાદ પડી શકે છે અને કેટલાક વિસ્તારોમાં ગાજવીજ તથા તેજ પવન સાથે વરસાદી માહોલ સર્જાઈ શકે છે.
અશોકભાઈ પટેલે ભારતીય હવામાન વિભાગની માહિતી ટાંકતાં જણાવ્યું કે હાલ ચોમાસાની ઉત્તર સીમા સુરત, ઇન્દોર, મંડલા, ડાલ્ટનગંજ અને મોતિહારી તરફથી પસાર થઈ રહી છે. આગામી બે દિવસમાં ગુજરાત, મધ્ય પ્રદેશ, છત્તીસગઢ, ઝારખંડ, બિહાર તથા ઉત્તર પ્રદેશના વધુ વિસ્તારોમાં ચોમાસું આગળ વધવા માટે પરિસ્થિતિ અનુકૂળ છે.
તેમણે વધુમાં જણાવ્યું કે સૌરાષ્ટ્ર સહિત દેશના વિવિધ વિસ્તારોમાં અપર એર સાયક્લોનિક સર્ક્યુલેશન સક્રિય છે અને આગામી દિવસોમાં એકથી વધુ સિસ્ટમો વિકસવાની શક્યતા છે. આ સિસ્ટમોના પ્રભાવ હેઠળ વરસાદનું પ્રમાણ અને તેની તીવ્રતામાં રોજબરોજ ફેરફાર થઈ શકે છે.
હવામાન નિષ્ણાતોના મત મુજબ આગામી સપ્તાહ દરમિયાન ગુજરાતમાં ચોમાસું વધુ સક્રિય બનશે અને ખાસ કરીને દક્ષિણ ગુજરાત તથા ગુજરાત રીજનમાં સારો વરસાદ નોંધાય તેવી સંભાવના છે, જ્યારે સૌરાષ્ટ્ર-કચ્છમાં પણ વરસાદી ગતિવિધિઓમાં વધારો જોવા મળશે.
