બનાસકાંઠા જિલ્લાની બનાસ જનરલ સિવિલ હોસ્પિટલે ફરી એકવાર મેડિકલ ક્ષેત્રે પોતાની ઉત્કૃષ્ટતા સાબિત કરી છે. રાજસ્થાનના મંડાર ગામના એક યુવકને 15 ફૂટની ઊંચાઈએથી પડવાને કારણે થયેલી ગંભીર ઇજાઓ બાદ, અહીંના તબીબોએ અત્યંત જટિલ સ્પાઇન સર્જરી કરી નવજીવન આપ્યું છે.
ઘટનાની વિગત: મોતને મ્હાત આપી
રાજસ્થાનના મંડાર ગામમાં રહેતા 32 વર્ષીય વિષ્ણુકુમાર, જેઓ વ્યવસાયે કડિયા કામ કરે છે. ગત 16 માર્ચના રોજ મકાન ચણતર દરમિયાન 15 ફૂટની ઊંચાઈએથી અચાનક નીચે પટકાયા હતા. આ અકસ્માતમાં તેમને કમર, ગરદન અને હાથના ભાગે ગંભીર ફ્રેક્ચર થયા હતા. ખાનગી હોસ્પિટલમાં મોટો ખર્ચ જણાવવામાં આવતા, પરિવાર તેમને પાલનપુરની આધુનિક બનાસ જનરલ સિવિલ હોસ્પિટલ ખાતે લાવ્યો હતો.
તબીબોનો પડકાર અને જટિલ સર્જરી
સિવિલના ટ્રોમા સેન્ટરમાં નિદાન દરમિયાન જાણવા મળ્યું કે દર્દીને:
-
કમરના મણકાનું મોટું ફ્રેક્ચર હતું.
-
ગરદનના C1-C2 વર્ટિબ્રામાં ગંભીર ઈજા હતી.
-
હાથના રેડિયસ ભાગમાં પણ ફ્રેક્ચર હતું.
દર્દીની હાલત નાજુક હોવાથી સિવિલ સુપ્રિટેન્ડેન્ટ ડો. સુનિલભાઈ જોશીના માર્ગદર્શન હેઠળ ઓર્થોપેડિક અને એનેસ્થેસિયાની ટીમે સર્જરીનો નિર્ણય લીધો. 3 કલાક ચાલેલા આ ઓપરેશનમાં આધુનિક ટેક્નોલોજીની મદદથી તૂટેલા મણકાઓને સ્થિર કરી ઇમ્પ્લાન્ટ્સ મૂકવામાં આવ્યા હતા.
સફળતાના સારથિ તબીબો:
-
ઓર્થોપેડિક ટીમ: ડૉ. ધવલ પ્રજાપતિ, ડૉ. નવેન્દુ રાજન, ડૉ. નરેશ ચૌધરી, ડૉ. પ્રશાંત મોદી.
-
એનેસ્થેસિયા ટીમ: ડૉ. દીપક મંગલ, ડૉ. શ્રેયા મોદી, ડૉ. કૌશલ્યા રાઠોડ.
