ભાવનગર: ચોમાસાએ ભાવનગર જિલ્લામાં ફરી મેહર વરસાવી છે. છેલ્લા 24 કલાક દરમિયાન જિલ્લામાં સરેરાશ 24.4 મી.મી. (0.96 ઇંચ) વરસાદ નોંધાયો છે, જેના કારણે વાતાવરણમાં ઠંડક પ્રસરી છે અને ખેડૂતોમાં ખુશીની લાગણી જોવા મળી રહી છે.
જિલ્લામાં સૌથી વધુ વરસાદ વલ્લભીપુર તાલુકામાં 45 મી.મી. (1.77 ઇંચ) નોંધાયો હતો. જ્યારે મહુવા તાલુકામાં સૌથી ઓછો 4 મી.મી. (0.16 ઇંચ) વરસાદ નોંધાયો હતો.
જિલ્લાના અન્ય તાલુકાઓમાં પણ હળવાથી મધ્યમ વરસાદ વરસતાં ગરમી અને બફારાથી લોકોને રાહત મળી છે. વરસાદના કારણે કૃષિ પાકોને પણ ફાયદો થવાની આશા વ્યક્ત કરવામાં આવી રહી છે અને ખેડૂતોમાં વાવણી તથા પાકના વિકાસને લઈને આશાવાદ વધ્યો છે.
હવામાન વિભાગની આગાહી મુજબ આગામી દિવસોમાં પણ ભાવનગર સહિત સૌરાષ્ટ્રના અનેક વિસ્તારોમાં વરસાદી માહોલ યથાવત રહેવાની શક્યતા છે. ભારે વરસાદની સંભાવનાને ધ્યાનમાં રાખીને તંત્ર દ્વારા જરૂરી સતર્કતા રાખવા અને નાગરિકોને હવામાન વિભાગની સૂચનાઓનું પાલન કરવાની અપીલ કરવામાં આવી છે.
