ફતેપુરા નગરમાં મુસ્લિમ ઘાંચી સમાજના કબરસ્તાન અને ફતેપુરા તળાવની જમીન પર છેલ્લા લાંબા સમયથી ચાલી રહેલા ગેરકાયદે ડમ્પિંગ યાર્ડના કારણે સ્થાનિકો અને રાહદારીઓ ત્રાહિમામ પોકારી ઉઠ્યા છે. આ ગંભીર જનહિતના પ્રશ્ન અંગે મુસલમાન ઘાંચી સમાજ પંચ અને મુસલમાન વક્ફ ટ્રસ્ટ, ફતેપુરા દ્વારા માનનીય મામલતદાર સાહેબ અને તાલુકા વિકાસ અધિકારી (TDO) ફતેપુરાને એક લેખિત આવેદનપત્ર પાઠવી ડમ્પિંગ યાર્ડનો કચરો સાફ કરવા તેમજ આ સ્થળ તાકીદે બદલવા ઉગ્ર રજૂઆત કરવામાં આવી છે.
કબરસ્તાનની પવિત્રતા જોખમાઈ, ધાર્મિક લાગણી દુભાઈ
આવેદનપત્રમાં જણાવ્યા અનુસાર, ફતેપુરા તળાવની જમીન પર કબરસ્તાનની બિલકુલ સામે જ ગ્રામ પંચાયત ફતેપુરા, કરોડીયાપૂર્વ તથા કાળીયા વલુંડા ગ્રામ પંચાયત દ્વારા પોતાના વિસ્તારનો તમામ કચરો ઠાલવવામાં આવે છે. એટલું જ નહીં, આ જગ્યાએ મરેલા પશુઓ અને જાનવરો પણ નાખવામાં આવતા હોવાથી ૨૪ કલાક અસહ્ય દુર્ગંધ ફેલાયેલી રહે છે.
પવનના કારણે કચરો ઉડીને કબરસ્તાનની અંદર અને કોટની આસપાસ જમા થાય છે. મુસ્લિમ સમાજમાં જ્યારે મરણના પ્રસંગે મૈયતને દફનવિધિ માટે તેમજ દરરોજ ઝિયારત અને ઇદ જેવા પવિત્ર તહેવારોએ મોટી સંખ્યામાં લોકો કબરસ્તાન ખાતે જાય છે. ત્યારે આ ગંદકી અને અસહ્ય દુર્ગંધના કારણે લોકો ભારે હાલાકી ભોગવી રહ્યા છે. અને તેમની ધાર્મિક લાગણી દુભાઈ રહી છે.
