રાજ્યભરમાં ઉનાળાનો પારો આસમાને પહોંચ્યો છે ત્યારે માણાવદર શહેરમાં કાળઝાળ ગરમી વચ્ચે નાગરિકોને ઠંડક આપવા માટે એક સરાહનીય સેવાયજ્ઞ શરૂ કરવામાં આવ્યો છે. શહેરની જાણીતી સામાજિક સંસ્થાઓ ‘અનસુયા ગૌધામ’ અને ‘લાયન્સ ક્લબ’ના સંયુક્ત ઉપક્રમે આજથી ત્રણ દિવસ માટે વિનામૂલ્યે છાશ વિતરણ કાર્યક્રમનો પ્રારંભ કરવામાં આવ્યો છે.
આ સેવા પ્રવૃત્તિ અંતર્ગત માણાવદરના મુખ્ય એવા શાકમાર્કેટ ચોક ખાતે ખાસ સ્ટોલ ઊભો કરવામાં આવ્યો છે. જ્યાં આગામી ત્રણ દિવસ સુધી સ્થાનિક રાહદારીઓ, શ્રમિકો અને વાહનચાલકોને ગરમીથી રાહત આપવા માટે ઠંડી છાશનું વિતરણ કરવામાં આવશે. ઉનાળાના આકરા તડકામાં લોકોની તરસ છીપાવવા માટે આ વ્યવસ્થા ઊભી કરાઈ છે.
