ગ્રીન લોકસભા અભિયાનને વેગ આપવા અને ઈંધણનો વ્યય અટકાવવા કેન્દ્રીય ગૃહમંત્રીનો મોટો નિર્ણય; દક્ષિણ પશ્ચિમ ઝોન ઓફિસ ખાતે જ તમામ બેઠકો યોજાશે
-
પ્રવાસ: કેન્દ્રીય ગૃહમંત્રી અમિતભાઈ શાહ બે દિવસના વતન (ગુજરાત) પ્રવાસે.
-
મુખ્ય હેતુ: ગાંધીનગર લોકસભા વિસ્તારમાં ‘ગ્રીન લોકસભા’ અભિયાન અને વિકાસ કાર્યોની સમીક્ષા.
-
મોટો સંદેશ: પેટ્રોલ-ડીઝલની બચત અને ટ્રાફિક સમસ્યા નિવારવા લીધા પ્રેરણાદાયી નિર્ણયો.
## ઈંધણ બચાવવા કાર્યકર્તાઓને એરપોર્ટ પર આવવાની ના પાડી
કેન્દ્રીય ગૃહ અને સહકારિતા મંત્રી અમિતભાઈ શાહ આજથી પોતાના બે દિવસીય ગુજરાત પ્રવાસે આવી પહોંચ્યા છે. આ પ્રવાસ દરમિયાન તેમણે પર્યાવરણની જાળવણી અને ઈંધણની બચત માટે એક પ્રેરણાદાયી પહેલ કરી છે. તેમણે પક્ષના કાર્યકર્તાઓને અપીલ કરી હતી કે તેમને રીસીવ કરવા માટે એરપોર્ટ પર મોટી સંખ્યામાં વાહનો લઈને આવવાની જરૂર નથી. પેટ્રોલ અને ડીઝલનો ખોટો વ્યય અટકાવવાના ઉદ્દેશ્ય સાથે આપવામાં આવેલી આ સૂચનાને પગલે, એરપોર્ટ પર માત્ર ગણતરીના આગેવાનો જ પ્રોટોકોલ મુજબ હાજર રહ્યા હતા.
## ટ્રાફિક ન થાય તે માટે એક જ સ્થળે તમામ બેઠકોનું આયોજન
સામાન્ય રીતે વીઆઈપી મૂવમેન્ટના કારણે વાહનોના કાફલાથી ટ્રાફિક વ્યવસ્થા ખોરવાતી હોય છે. આ સમસ્યાથી નાગરિકોને બચાવવા અમિતભાઈ શાહે અલગ-અલગ સ્થળોએ જવાને બદલે એક જ સ્થળે તમામ બેઠકો યોજવાનો નિર્ણય કર્યો છે. અમદાવાદના જોધપુર-બોડકદેવ વિસ્તારમાં આવેલી મ્યુનિસિપલ કોર્પોરેશનની દક્ષિણ પશ્ચિમ ઝોન ઓફિસ ખાતે આ મહત્વની સમીક્ષા બેઠકો યોજાઈ રહી છે. ગૃહમંત્રી અહીં એક જ કચેરી ખાતેથી તમામ વહીવટી અને સંગઠનાત્મક સમીક્ષાઓ પૂર્ણ કરશે. ખાસ વાત એ છે કે, તેઓ પોતે પણ પોતાના કાફલામાં ઘટાડો કરીને માત્ર 4 ગાડીઓ સાથે બેઠકમાં પહોંચ્યા હતા.
## પ્રથમ બેઠક: ‘ગ્રીન લોકસભા’ અને તળાવોના નવીનીકરણ પર ભાર
ગાંધીનગર લોકસભા બેઠકને હરિયાળી બનાવવા માટે ‘ગ્રીન લોકસભા’ અભિયાન ચલાવવામાં આવી રહ્યું છે. પ્રથમ બેઠકમાં આ અંતર્ગત થનારા વૃક્ષારોપણ અને જળ સંચયના કાર્યોની સમીક્ષા કરવામાં આવી હતી.
-
વૃક્ષારોપણ: સંસદીય વિસ્તારમાં મોટા પાયે હાથ ધરાનારા વૃક્ષારોપણ કાર્યક્રમની પ્રગતિ ચકાસવામાં આવી.
-
જળ સંચય: ગ્રામ્ય અને શહેરી વિસ્તારોમાં આવેલા સ્થાનિક તળાવોના નવીનીકરણ અને બ્યુટિફિકેશન (સુશોભીકરણ)ના પ્રોજેક્ટ્સને પ્રાધાન્ય આપવામાં આવ્યું છે, જેથી ભૂગર્ભ જળના સ્તર ઊંચા લાવી શકાય.
## બીજી બેઠક: SG હાઈવેને ડસ્ટ-ફ્રી બનાવવા અને ટ્રાફિક નિયમન અંગે ચર્ચા
અમિતભાઈ શાહની અધ્યક્ષતામાં યોજાયેલી બીજી મહત્વની બેઠકમાં ગાંધીનગર-સરખેજ હાઇવેના આધુનિકરણ અંગે ચર્ચા થઈ હતી.
-
ટ્રાફિક અને પાર્કિંગ: હાઈવે પર ટ્રાફિકની સમસ્યા હળવી કરવા અને પાર્કિંગ વ્યવસ્થા બાબતે વિસ્તૃત ચર્ચા થઈ.
-
ડસ્ટ ફ્રી હાઈવે: એસ.જી. હાઇવે સંપૂર્ણપણે ધૂળમુક્ત (Dust Free) થાય તે દિશામાં આગળની કામગીરીની સમીક્ષા કરાઈ.
-
બ્રિજની કામગીરી: એસ.જી. હાઇવે કર્ણાવતી જંક્શનથી સરખેજ બ્રિજના ચાલી રહેલા કામોની પણ સમીક્ષા કરવામાં આવી હતી.
