ગૃહમંત્રી અમિત શાહ પર આક્ષેપ બાદ શાસક પક્ષ આક્રમક; પુરાવાની માંગ સાથે લોકસભાની કાર્યવાહી બે વખત સ્થગિત
નવી દિલ્હી: એન્ટી પેપર લીક સુધારા બિલ પર લોકસભામાં ચાલી રહેલી ચર્ચાના બીજા દિવસે ભારે રાજકીય ટકરાવ જોવા મળ્યો હતો. વિપક્ષના નેતા રાહુલ ગાંધીએ નીટ પેપર લીક વિરોધી આંદોલન દરમિયાન થયેલી પોલીસ કાર્યવાહી મુદ્દે ગૃહમંત્રી અમિત શાહ પર ગંભીર આક્ષેપ કરતાં શાસક અને વિપક્ષ વચ્ચે જોરદાર હોબાળો મચ્યો હતો. પરિસ્થિતિ એટલી ઉગ્ર બની કે લોકસભાની કાર્યવાહી બે વખત સ્થગિત કરવાની ફરજ પડી હતી.
ચર્ચા દરમિયાન રાહુલ ગાંધીએ દાવો કર્યો હતો કે આંદોલનકારીઓ સામે થયેલી કડક કાર્યવાહી ઉચ્ચ સ્તરના આદેશથી કરવામાં આવી હતી. આ નિવેદન બાદ સંસદીય બાબતોના મંત્રી કિરણ રિજિજુ સહિત એનડીએના સભ્યોએ તાત્કાલિક વિરોધ નોંધાવ્યો અને રાહુલ ગાંધી પાસેથી તેમના આક્ષેપોના પુરાવા રજૂ કરવા અથવા માફી માંગવાની માંગ કરી હતી.
લોકસભાના અધ્યક્ષ ઓમ બિરલાએ પણ રાહુલ ગાંધીને તથ્ય આધારિત નિવેદન આપવા સૂચના આપી હતી. તેમ છતાં બંને પક્ષ વચ્ચેનો વિવાદ વધુ ઉગ્ર બનતાં ગૃહમાં સતત સૂત્રોચ્ચાર અને હોબાળો થયો હતો.
પોતાના ભાષણમાં રાહુલ ગાંધીએ પેપર લીક, વિદ્યાર્થીઓ પર થયેલી પોલીસ કાર્યવાહી અને શિક્ષણ વ્યવસ્થાને લઈને કેન્દ્ર સરકાર પર આકરા પ્રહારો કર્યા હતા. તેમણે દાવો કર્યો કે વિદ્યાર્થીઓના હિતોની અવગણના થઈ રહી છે અને શિક્ષણ વ્યવસ્થામાં વ્યાપક સુધારાની જરૂર છે.
શાસક પક્ષે રાહુલ ગાંધીના નિવેદનોને બિનઆધારભૂત અને ગેરજવાબદાર ગણાવ્યા હતા. કિરણ રિજિજુએ કહ્યું કે પુરાવા વિના ગૃહમંત્રી પર આવા ગંભીર આરોપો લગાવવું યોગ્ય નથી અને આ મુદ્દે સંસદીય નિયમો મુજબ કાર્યવાહી કરવામાં આવશે.
હોબાળા બાદ લોકસભા અધ્યક્ષની ચેમ્બરમાં વરિષ્ઠ મંત્રીઓ અને સંસદીય નેતાઓની બેઠક યોજાઈ હતી. રાહુલ ગાંધીના નિવેદનને લઈને આગળ શું કાર્યવાહી થશે અને બિલ પરની ચર્ચા કેવી રીતે આગળ વધશે તેના પર હવે સૌની નજર ટકેલી છે.
