સંસદ તરફ કૂચનો એલાન યથાવત; વડાપ્રધાનના રાજીનામાની માંગ સાથે વિરોધ વધુ તેજ બન્યો
નવી દિલ્હી: સોનમ વાંગચૂકને ઉપવાસ દરમિયાન તબિયત બગડતાં હોસ્પિટલમાં ખસેડવામાં આવ્યા બાદ હવે આંદોલનને આગળ વધારવા માટે કાર્યકર અભિજીત દીપકે જંતર-મંતર ખાતે આમરણ ઉપવાસ શરૂ કર્યો છે. તેમના આ નિર્ણય બાદ રાજધાની દિલ્હીમાં ફરી વિરોધ પ્રદર્શન તેજ બન્યું છે.
અભિજીત દીપકે જણાવ્યું કે સોનમ વાંગચૂકનું આંદોલન અધૂરું નહીં રહે અને સંસદ ભવન તરફ કૂચ કરવાનો અગાઉ જાહેર કરાયેલ કાર્યક્રમ પણ યથાવત રહેશે. તેમણે દાવો કર્યો કે હવે આંદોલનને વધુ વ્યાપક બનાવવામાં આવશે.
તેમણે કહ્યું કે અગાઉ તેમની માંગ કેન્દ્રીય શિક્ષણ મંત્રીના રાજીનામા સુધી મર્યાદિત હતી, પરંતુ હવે સમગ્ર મુદ્દાની નૈતિક જવાબદારી નક્કી કરવાની માંગ સાથે વડાપ્રધાનના રાજીનામાની માંગ પણ કરવામાં આવશે.
જંતર-મંતર વિસ્તાર ખાલી કરાવવા પોલીસ દ્વારા કરવામાં આવેલી કાર્યવાહીના વીડિયો અને તસવીરો સોશિયલ મીડિયા પર વાયરલ થયા બાદ રાજકીય ચર્ચાઓ તેજ બની છે. કેટલાક આંદોલનકારીઓએ પોલીસ પર બળપ્રયોગના આક્ષેપ કર્યા છે, જ્યારે દિલ્હી પોલીસે જણાવ્યું છે કે કાયદો અને વ્યવસ્થા જાળવવા માટે જરૂરી અને સંયમિત કાર્યવાહી કરવામાં આવી હતી.
આંદોલનને ધ્યાનમાં રાખીને સંસદ ભવન અને જંતર-મંતર આસપાસ સુરક્ષા વ્યવસ્થા વધુ કડક બનાવવામાં આવી છે. આગામી દિવસોમાં વિરોધ પ્રદર્શન વધુ ઉગ્ર બને તેવી શક્યતાને લઈને પ્રશાસન સતર્ક બન્યું છે.
