રાજકોટ: શહેરના માધાપર ચોકડી નજીક આજે એક કારમાં અચાનક આગ ભભૂકી ઊઠતા રસ્તા પર દોડધામ મચી ગઈ હતી. કારમાંથી ધુમાડાના ગોટેગોટા નીકળતા ચાલકે સમયસૂચકતા દાખવી તાત્કાલિક વાહનમાંથી બહાર નીકળી જતાં મોટી દુર્ઘટના ટળી હતી.
ઘટનાની જાણ થતાં જ રાજકોટ ફાયર બ્રિગેડની ટીમ તાત્કાલિક સ્થળ પર પહોંચી ગઈ હતી. ફાયર કર્મચારીઓએ ઝડપી કામગીરી હાથ ધરી આગને કાબૂમાં લીધી હતી, જેના કારણે આગ અન્ય વાહનો અથવા આસપાસના વિસ્તારમાં ફેલાતી અટકાવવામાં સફળતા મળી હતી.
આગની ઘટનામાં કારને નોંધપાત્ર નુકસાન થયું છે, જોકે સદનસીબે કોઈ જાનહાનિ કે ઈજાના સમાચાર સામે આવ્યા નથી.
પ્રાથમિક અનુમાન મુજબ આગ શોર્ટ સર્કિટ અથવા ટેકનિકલ ખામીને કારણે લાગી હોવાની શક્યતા વ્યક્ત કરવામાં આવી રહી છે. આગ લાગવાનું ચોક્કસ કારણ જાણવા સંબંધિત તંત્ર દ્વારા તપાસ શરૂ કરવામાં આવી છે.
