બોલિવૂડ અભિનેતા સુશાંત સિંહ રાજપૂતના મોતના મામલાએ સમગ્ર દેશને હચમચાવી દીધો હતો. અભિનેતાના અવસાનને 6 વર્ષ પૂર્ણ થઈ ચૂક્યા છે, પરંતુ આજે પણ તેમના ચાહકો આ આઘાતમાંથી બહાર આવી શક્યા નથી અને તેના મોતનું રહસ્ય અકબંધ છે. હવે સુશાંત સિંહ રાજપૂતના આ વણઉકેલાયેલા કેસ અને તેની પાછળના વિવાદો પર એક મોટી બોલિવૂડ ફિલ્મ બનવા જઈ રહી છે, જેનું સત્તાવાર પોસ્ટર રિલીઝ કરી દેવામાં આવ્યું છે. આ ફિલ્મને ‘સોરી બાબુ’ (Sorry Babu) નામ આપવામાં આવ્યું છે, જેણે સોશિયલ મીડિયા પર ભારે ચર્ચા જગાવી છે.
મોત બાદ ભારે ચર્ચામાં રહ્યો હતો આ શબ્દ
સુશાંત સિંહ રાજપૂતના રહસ્યમય મોત અને ત્યારબાદ સર્જાયેલા વિવાદો પર આધારિત આ ફિલ્મનું નામ ‘સોરી બાબુ’ રાખવા પાછળ એક મોટું કારણ છે. અભિનેતાના મૃત્યુ બાદ તપાસ દરમિયાન કૂપર હોસ્પિટલના શબઘર (Mortuary) સાથે જોડાયેલા ઘટનાક્રમમાં આ શબ્દ ભારે વિવાદોમાં રહ્યો હતો. આ ફિલ્મમાં સુશાંતના મોત સાથે જોડાયેલા કેટલાક વણસ્પર્શ્યા પાસાઓ અને વિવાદોને મોટા પડદા પર દર્શાવવામાં આવશે.
સત્ય ટૂંક સમયમાં સામે આવશે: મેકર્સનો દાવો
‘સોરી બાબુ’ ફિલ્મનું ફર્સ્ટ લુક પોસ્ટર સોશિયલ મીડિયા પર વાયરલ થઈ રહ્યું છે. આ ફિલ્મનું નિર્માણ ‘એસએસઆર ફિલ્મ્સ’ના બેનર હેઠળ કરવામાં આવી રહ્યું છે, જ્યારે બોલિવૂડના જાણીતા ડાયરેક્ટર દીપક ભાગવત આ ફિલ્મનું નિર્દેશન કરી રહ્યા છે.
ફિલ્મનું પોસ્ટર શેર કરતા મેકર્સ ફેન્સે કેપ્શનમાં લખ્યું છે કે,
“સત્ય ટૂંક સમયમાં જ સામે આવશે. એક એવી વાર્તા જે સવાલો ઉભા કરશે, સત્યની રેખાઓ દોરશે અને દરેક દર્શકને વિચારવા પર મજબૂર કરી દેશે. એક પછી એક તમામ લોકોના ચહેરા પરથી નકાબ ઉતરી જશે.”
