ટીવી અને ફિલ્મ ઇન્ડસ્ટ્રીમાંથી એક અત્યંત ચોંકાવનારા અને કાળજું કંપાવી દે તેવા સમાચાર સામે આવ્યા છે. જાણીતી ૩૦ વર્ષીય અભિનેત્રી સંચિતા ઉગલેએ મુંબઈના નાલાસોપારા સ્થિત પોતાના ઘરે ગળે ફાંસો ખાઈને આત્મહત્યા કરી લીધી છે. આ આઘાતજનક ઘટના રવિવારે સાંજે ૫:૩૦ થી ૭:૩૦ વાગ્યાના સમયગાળા દરમિયાન બની હતી. આશાસ્પદ એક્ટ્રેસના આવા આકસ્મિક નિધનથી સમગ્ર ટીવી જગત ઘેરા સદમામાં છે.
બહેન બહાર ગઈ ને પાછળથી સંચિતાએ અંતિમ પગલું ભરી લીધું
પોલીસ તપાસમાંથી મળતી માહિતી મુજબ, સંચિતા નાલાસોપારાના આચોલે ગામમાં પોતાના માતા-પિતા અને ૧૫ વર્ષની નાની બહેન અંજલિ સાથે રહેતી હતી. રવિવારે સાંજે આશરે સાડા પાંચ વાગ્યે તેની નાની બહેન કોઈ કામસર બહાર ગઈ હતી અને માતા-પિતા પણ ઘરે નહોતા. ઘરમાં કોઈ ન હોવાનો લાભ ઉઠાવી સંચિતાએ બેડરૂમના સીલિંગ ફેન સાથે સાડી બાંધી આત્મહત્યા કરી લીધી હતી. બહેન જ્યારે ઘરે પાછી આવી ત્યારે આ ભયાનક ઘટનાની જાણ થઈ હતી. પરિવારે સ્થાનિક લોકોની મદદથી સંચિતાને તુરંત મહાનગરપાલિકાની હોસ્પિટલ ખસેડી હતી, પરંતુ ડોક્ટરોએ તેને મૃત જાહેર કરી હતી.
વિકી કૌશલની ફિલ્મ ‘છાવા’ માં ભજવ્યો હતો મહત્વનો રોલ
સંચિતા ઉગલે ટીવી અને હિન્દી સિનેમાનો એક જાણીતો ચહેરો બની રહી હતી. તેણે પોતાની એક્ટિંગના જોરે ઇન્ડસ્ટ્રીમાં સારું સ્થાન મેળવ્યું હતું:
-
મોટા પડદા પર: વિકી કૌશલની આગામી ચર્ચિત ઐતિહાસિક ફિલ્મ ‘છાવા’ માં તેણે ‘તારાબાઈ’ નું મહત્વનું પાત્ર ભજવ્યું હતું. આ ઉપરાંત ફિલ્મ ‘દિલવાલી દૂલ્હા લે જાયેગી’ માં તે ‘સુકૂન’ ના રોલમાં જોવા મળી હતી.
-
ટીવી સીરિયલ્સ: નાના પડદાના સુપરહિટ શો ‘કુમકુમ ભાગ્ય’ અને ‘વાગલે કી દુનિયા’ જેવા લોકપ્રિય ધારાવાહિકોમાં કામ કરીને તેણે દર્શકોના દિલ જીત્યા હતા.
