ભારતની સૌથી મોટી જાહેર ક્ષેત્રની બેંક, સ્ટેટ બેંક ઓફ ઈન્ડિયા (SBI) ને આવકવેરા વિભાગ (Income Tax Department) તરફથી અસેસમેન્ટ વર્ષ 2023-24 માટે ₹6,338 કરોડની ટેક્સ ડિમાન્ડ નોટિસ મળી છે. બેંકે સ્ટોક એક્સચેન્જ ફાઇલિંગમાં આ અંગેની સત્તાવાર જાણકારી આપી છે. આ સમાચારની સીધી અસર સોમવારે બેંકના શેરના ભાવ પર જોવા મળી શકે છે.
કેમ મળી આ નોટિસ?
આવકવેરા વિભાગ દ્વારા કરવામાં આવેલી સમીક્ષા પ્રક્રિયા દરમિયાન કેટલીક નાણાકીય બાબતોને અસ્વીકાર (Disallowances) કરવામાં આવતા, વ્યાજ સહિત કુલ ₹6,338 કરોડની માંગ ઊભી થઈ છે. એક્સચેન્જ ફાઇલિંગ મુજબ, આ આદેશ 19 માર્ચ, 2026 ના રોજ આવકવેરા અધિનિયમની કલમ 143(3), 144C(3) અને 144B હેઠળ જારી કરવામાં આવ્યો છે.
બેંકનું શું કહેવું છે?
SBI એ આ બાબતે સ્પષ્ટતા કરતા જણાવ્યું છે કે:
-
કામકાજ પર અસર નહીં: આ ટેક્સ ડિમાન્ડથી બેંકની દૈનિક કામગીરી કે વ્યાપારી પ્રવૃત્તિઓ પર કોઈ નકારાત્મક અસર પડશે નહીં.
-
કાનૂની પગલાં: બેંક આ મામલે નિર્ધારિત સમય મર્યાદામાં સંબંધિત એપેલેટ સત્તાધિકારીઓ સમક્ષ અપીલ દાખલ કરશે અને યોગ્ય કાનૂની લડત આપશે.
-
જૂના વિવાદો: બેંકે એમ પણ ઉમેર્યું કે, પાછલા વર્ષોમાં પણ આવા જ ટેક્સના કેસ કોર્ટમાં પેન્ડિંગ છે. એટલે કે આ કોઈ નવો મુદ્દો નથી. પરંતુ ચાલી રહેલા વિવાદોનો જ એક ભાગ છે.
SBI શેરની સ્થિતિ
શુક્રવારે NSE પર SBI નો શેર 0.9% ના ઉછાળા સાથે ₹1,058.3 પર બંધ રહ્યો હતો. બજારની વર્તમાન સ્થિતિ પર એક નજર:
-
આ વર્ષે અત્યાર સુધીમાં SBI ના શેરમાં 5% નો વધારો થયો છે.
-
નિફ્ટી 50 અને નિફ્ટી બેંક ઇન્ડેક્સમાં અનુક્રમે 6% અને 10.5% ના ઘટાડા સામે SBI એ સારું પ્રદર્શન કર્યું છે.
-
છેલ્લા એક વર્ષમાં આ સ્ટોકે રોકાણકારોને 5% નું શાનદાર વળતર આપ્યું છે.
