ગુજરાતના રસોડામાં ‘હાશકારો’: ગેસ સંકટ ખાળવા CM ભૂપેન્દ્ર પટેલનો માસ્ટરસ્ટ્રોક, જાણો જનતા અને વેપારીઓને શું થશે મોટો ફાયદો

મિડલ ઈસ્ટમાં વકરી રહેલા યુદ્ધની સીધી અસર ગુજરાતના બળતણ પુરવઠા પર પડતા જ મુખ્યમંત્રી ભૂપેન્દ્ર પટેલ હરકતમાં આવ્યા છે. રાજ્યમાં સંભવિત ઊર્જા કટોકટીને પહોંચી વળવા માટે મુખ્યમંત્રીએ ગાંધીનગરમાં ઉચ્ચ સ્તરીય બેઠક બોલાવી હતી. આ બેઠકમાં રાજ્યના વેપારીઓ, હોટલ ઉદ્યોગ અને સામાન્ય નાગરિકોને ગેસની અછતમાંથી મુક્તિ અપાવવા માટે ‘માસ્ટર પ્લાન’ તૈયાર કરવામાં આવ્યો છે.

હોટલ-રેસ્ટોરન્ટ્સને હવે કનેક્શન માટે નહીં જોવી પડે રાહ

રાજ્ય સરકારના નવા આદેશ મુજબ, જે વિસ્તારોમાં ગેસ પાઈપલાઈનનું નેટવર્ક પહેલેથી જ બિછાવેલું છે, ત્યાં હવે હોટલ, રેસ્ટોરન્ટ અને વ્યાપારી એકમોને તાત્કાલિક ધોરણે PNG (Piped Natural Gas) કનેક્શન આપવામાં આવશે. અત્યાર સુધી જે વહીવટી પ્રક્રિયામાં મહિનાઓ નીકળી જતા હતા, તેને હવે ‘નો વેઈટિંગ પોલિસી’ હેઠળ લાવી દેવામાં આવી છે. આ નિર્ણયનો મુખ્ય હેતુ કોમર્શિયલ ગેસ સિલિન્ડર પરની નિર્ભરતા ઘટાડીને ખાદ્ય ઉદ્યોગ અને શૈક્ષણિક સંસ્થાઓની કેન્ટીનને અવિરત ઈંધણ પૂરું પાડવાનો છે.

‘ડોમેસ્ટિક ગેસ’ પર સરકારની સ્પષ્ટતા: ગભરાવાની જરૂર નથી

ગેસની અછતને લઈને ફેલાતી અફવાઓ પર પૂર્ણવિરામ મૂકતા રાજ્ય સરકારે ખાતરી આપી છે કે ગુજરાતમાં ઘરેલુ વપરાશકારો માટે ગેસનો જથ્થો પૂરતો છે. GSPC અને ઊર્જા વિભાગના અધિકારીઓએ બેઠકમાં જણાવ્યું હતું કે સામાન્ય જનતાના રસોડા સુધી પહોંચતા PNG સપ્લાયમાં કોઈ કાપ મૂકવામાં આવશે નહીં. સપ્લાય ચેઈનને વધુ મજબૂત કરવા માટે અધિકારીઓને 24 કલાક મોનિટરિંગ કરવાના કડક આદેશો આપવામાં આવ્યા છે, જેથી આંતરરાષ્ટ્રીય સ્તરે ગમે તેવી સ્થિતિ હોય તો પણ ગુજરાતના નાગરિકોને મુશ્કેલી ન પડે.

દિગ્ગજોની ટીમ અને અસરકારક રણનીતિ

મુખ્યમંત્રીની આ બેઠકમાં સરકારની આખી ‘કોર ટીમ’ એક્શનમાં જોવા મળી હતી. નાયબ મુખ્યમંત્રી હર્ષ સંઘવી અને ઊર્જા મંત્રી ઋષિકેશ પટેલની ઉપસ્થિતિમાં લેવાયેલા આ નિર્ણયોમાં ડૉ. હસમુખ અઢિયા અને એમ.કે. દાસ જેવા અનુભવી અધિકારીઓએ નીતિવિષયક માર્ગદર્શન પૂરું પાડ્યું હતું. આ બેઠક બાદ પ્રવાસન અને ફૂડ ઉદ્યોગમાં ખુશીની લહેર છે, કારણ કે ગેસના અભાવે ભાવવધારો થવાની જે ભીતિ હતી તે હવે દૂર થશે અને ગ્રાહકોને વ્યાજબી ભાવે શ્રેષ્ઠ સુવિધા મળતી રહેશે.