ગુજરાતની ધરા પરથી ‘ચિપક્રાંતિ’: PM મોદીએ સાણંદમાં માઇક્રોનના અત્યાધુનિક પ્લાન્ટનું કર્યું ઉદ્ઘાટન

ભારત હવે માત્ર સેમિકન્ડક્ટરનો વપરાશકર્તા જ નહીં, પણ ઉત્પાદક દેશ બનવા તરફ મક્કમ ડગ માંડી રહ્યો છે.વડાપ્રધાન નરેન્દ્ર મોદીએ સાણંદ ખાતે માઇક્રોન ટેક્નોલોજી (Micron Technology) ના ભવ્ય ATMP (એસેમ્બ્લી, ટેસ્ટિંગ, માર્કિંગ અને પેકેજિંગ) પ્લાન્ટનું ઉદ્ઘાટન કરીને દેશને પ્રથમ ‘મેડ ઇન ઇન્ડિયા’ ચિપની ભેટ આપી છે.આ ઐતિહાસિક ક્ષણ પહેલા PM મોદીએ ભવ્ય રોડ-શો યોજી જનમેદનીનું અભિવાદન ઝીલ્યું હતું.

₹22,516 કરોડનું રોકાણ અને રોજગારીનું નવું સરનામું

માઇક્રોન સેમિકન્ડક્ટર ઇન્ડિયા દ્વારા સાણંદમાં કરવામાં આવેલું આ જંગી રોકાણ ભારતના ટેક-ઈકોસિસ્ટમને વૈશ્વિક નકશા પર અંકિત કરશે.

• રોકાણ: ₹22,516 કરોડની માતબર રકમ.

• ઉત્પાદન: સોલિડ સ્ટેટ ડ્રાઇવ (SSD), DRAM અને NAND જેવી હાઇ-ટેક મેમરી પ્રોડક્ટ્સ.

• રોજગારી: હાલ 2,000 નિષ્ણાતોની ટીમ કાર્યરત છે, જે આગામી સમયમાં 5,000 સુધી પહોંચશે.

• સમાવેશી અભિગમ: ખાસ નોંધનીય છે કે આ પ્લાન્ટમાં દિવ્યાંગ નાગરિકોને પણ ઓપરેટર અને ટેક્નિશિયન તરીકે જોડીને આત્મનિર્ભર બનાવવામાં આવ્યા છે.

રેતીથી ચિપ સુધીની જટિલ સફર: ટેક્નોલોજીનો ચમત્કાર

સેમિકન્ડક્ટર ચિપ બનાવવાની પ્રક્રિયા વિજ્ઞાન અને એન્જિનિયરિંગનો અદભૂત સંગમ છે:

1. શુદ્ધિકરણ: રેતીમાંથી સિલિકોન અલગ કરી તેના ઇનગોટ (સિલિન્ડર) તૈયાર કરાય છે.

2. વેફર નિર્માણ: આ સિલિન્ડરના અતિ બારીક ટુકડા કરીને ‘વેફર્સ’ બનાવવામાં આવે છે.

3. ફોટોલિથોગ્રાફી: ફેબ્રિકેશન પ્લાન્ટમાં આ વેફર્સ પર ઇલેક્ટ્રિક પેટર્ન અને અબજો ટ્રાન્ઝિસ્ટર્સ કંડારવામાં આવે છે.

4. સાણંદનું યોગદાન: આ વેફર્સ સાણંદના ATMP પ્લાન્ટમાં આવે છે, જ્યાં તેનું અત્યંત સચોટ એસેમ્બલી, સ્પીડ ટેસ્ટિંગ, માર્કિંગ અને પેકેજિંગ કરીને અંતિમ પ્રોડક્ટ તૈયાર થાય છે.

AI યુગનું ઇંધણ બનશે ગુજરાતમાં બનેલી ચિપ્સ

માઇક્રોનના CEO સંજય મેહરોત્રાએ જણાવ્યું હતું કે, “આજની આર્ટિફિશિયલ ઇન્ટેલિજન્સ (AI) ની દુનિયામાં ડેટા પ્રોસેસિંગ માટે સુપરફાસ્ટ મેમરી અનિવાર્ય છે. સાણંદમાં તૈયાર થતી આ ચિપ્સ માત્ર ભારત જ નહીં, પરંતુ સમગ્ર વિશ્વની AI જરૂરિયાતોને સંતોષવામાં મહત્વની ભૂમિકા ભજવશે.”