પાકિસ્તાનમાં થયેલા આત્મઘાતી હુમલામાં 18 સૈનિકો અને 6 આતંકીઓના મોત થયાં છે.
પાડોશી દેશ પાકિસ્તાન ફરી એકવાર આત્મઘાતી હુમલાથી હચમચી ગયું છે. એક આત્મઘાતી બોમ્બરે ઉત્તરપશ્ચિમ ખૈબર પખ્તુનખ્વા પ્રાંતમાં એક સંયુક્ત ચેકપોસ્ટ પર વિસ્ફોટકોથી ભરેલા વાહનને ટક્કર મારી હતી, જેમાં 12 સુરક્ષા કર્મચારીઓના મોત થયા હતા. બુધવારે આ માહિતી આપતાં સેનાએ કહ્યું કે ત્યારપછી થયેલા એન્કાઉન્ટરમાં છ આતંકીઓને ઠાર કરવામાં આવ્યા છે. પાકિસ્તાની સેનાની મીડિયા વિંગ ઇન્ટર-સર્વિસ પબ્લિક રિલેશન્સ (ISPR)એ જણાવ્યું કે, આતંકવાદીઓએ મંગળવારે મોડી રાત્રે બન્નુ જિલ્લાના મલિકેલ વિસ્તારમાં એક સંયુક્ત ચેકપોસ્ટ પર હુમલો કરવાનો પ્રયાસ કર્યો, પરંતુ સુરક્ષા દળોએ ચોકીમાં પ્રવેશવાના પ્રયાસને નિષ્ફળ બનાવ્યો હતો.
18 જવાનોના મોતથી ખળભળાટ
આતંકવાદીઓ દ્વારા કરવામાં આવેલા આત્મઘાતી વિસ્ફોટને કારણે દિવાલનો એક ભાગ તૂટી પડ્યો હતો અને આસપાસના માળખાને નુકસાન થયું હતું, જેના પરિણામે 10 સુરક્ષા દળો અને બે ફ્રન્ટિયર કોન્સ્ટેબલરીના જવાનો સહિત 12 સુરક્ષા કર્મચારીઓના મોત થયા હતા. સેનાએ કહ્યું કે ત્યારબાદ થયેલી ગોળીબારમાં છ આતંકીઓ પણ માર્યા ગયા. ઘાયલોને સ્થાનિક હોસ્પિટલમાં દાખલ કરવામાં આવ્યા છે. હાફિઝ ગુલ બહાદુર સશસ્ત્ર જૂથે હુમલાની જવાબદારી લીધી હતી. છેલ્લા 24 કલાકમાં 18 જવાનોના મોતથી પાકિસ્તાનમાં ખળભળાટ મચી ગયો છે. સતત હુમલાના કારણે લોકોમાં ભયનો માહોલ છે.
લશ્કરી કાર્યવાહીની મંજૂરીના બીજા દિવસે હુમલો
પાકિસ્તાની આર્મીએ મંગળવારે બલૂચિસ્તાનમાં આતંકવાદી સંગઠનો વિરુદ્ધ લશ્કરી કાર્યવાહી”ને મંજૂરી આપ્યાના એક દિવસ બાદ આ હુમલો થયો છે. બન્નુ જિલ્લામાં, જ્યાં આ ઘટના બની હતી, ત્યાં તાજેતરમાં ઉગ્રવાદી અને આતંકવાદી હિંસામાં વધારો જોવા મળ્યો છે. જેમાં પોલીસકર્મીઓનું અપહરણ, કન્યા શાળા પર હુમલો અને ગોળીબારનો સમાવેશ થાય છે. જુલાઈમાં પાકિસ્તાન સરકારે પ્રતિબંધિત આતંકવાદી સંગઠન તહરીક-એ-તાલિબાન પાકિસ્તાન (TTP) ને ફિતના અલ ખાવરિજ નામ આપ્યું હતું અને પાકિસ્તાન પર આતંકવાદી હુમલાઓનો ઉલ્લેખ કરતી વખતે તમામ સંસ્થાઓને ખારીજી (બહાર) શબ્દનો ઉપયોગ કરવાનો આદેશ આપ્યો હતો. ISPRના નિવેદનમાં કહેવામાં આવ્યું છે કે પોલીસ ચોકીમાં ઘૂસવાના પ્રયાસને અમારા જ જવાનોએ નિષ્ફળ બનાવ્યો હતો, જેના કારણે ખાવરિઝે વિસ્ફોટકોથી ભરેલા વાહનને ચોકીની દિવાલ સાથે અથડાવી દીધું હતું.
