ખંભાળિયા: દેવભૂમિ દ્વારકા જિલ્લાના ખંભાળિયા વિસ્તારમાં નોંધાયેલા વિદેશી દારૂના ગુનામાં છેલ્લા એક વર્ષથી પોલીસને ચકમો આપતો ફરાર આરોપી આખરે એસઓજીના જાળમાં સપડાયો છે. ચોક્કસ બાતમીના આધારે સુરેન્દ્રનગર જિલ્લાના ચોટીલા તાલુકામાંથી આરોપીની ધરપકડ કરવામાં આવી હતી.
પોલીસના જણાવ્યા મુજબ, વર્ષ 2025 દરમિયાન ખંભાળિયા વિસ્તારમાં આશરે રૂ. 1.75 લાખની કિંમતની વિદેશી દારૂની 131 બોટલો સાથે સંબંધિત ગુનો નોંધાયો હતો. તપાસ દરમિયાન સુરેન્દ્રનગર જિલ્લાના ચોટીલા તાલુકાના **ચાણપા ગામના રહેવાસી કુલદીપ ઉર્ફે ધમભા નારણભાઈ ગોહિલ (ઉંમર 28 વર્ષ)**નું નામ સામે આવ્યું હતું. ગુનો નોંધાયા બાદ આરોપી સતત ફરાર રહ્યો હતો.
જિલ્લા પોલીસ વડા જયરાજસિંહ વાળાના માર્ગદર્શન હેઠળ એસઓજીના પીઆઈ વી.એ. રાણાની ટીમે આરોપીની શોધખોળ શરૂ કરી હતી. દરમિયાન એએસઆઈ વિરેન્દ્રસિંહ મનુભા જાડેજા અને વિજયસિંહ જાડેજાને મળેલી વિશ્વસનીય બાતમીના આધારે ચાણપા ગામમાં દરોડો પાડી આરોપીને ઝડપી લેવામાં આવ્યો હતો.
ધરપકડ બાદ આરોપીને વધુ પૂછપરછ અને કાયદેસરની કાર્યવાહી માટે ખંભાળિયા પોલીસના હવાલે કરવામાં આવ્યો છે. સમગ્ર પ્રકરણમાં અન્ય કોઈ વ્યક્તિની સંડોવણી છે કે નહીં તે સહિતના મુદ્દાઓની પોલીસે વધુ તપાસ શરૂ કરી છે.
