ચડાવા ચોરી પ્રકરણ બાદ પ્રથમ મહત્વપૂર્ણ બેઠક, ટ્રસ્ટના સભ્યો બહુમતીથી લેશે નિર્ણય
અયોધ્યા: શ્રી રામ જન્મભૂમિ તીર્થ ક્ષેત્ર ટ્રસ્ટની આજે યોજાનારી બેઠક પર સૌની નજર મંડાઈ છે. ચડાવા ચોરી પ્રકરણ બાદ મળનારી આ પ્રથમ મહત્વપૂર્ણ બેઠકમાં ટ્રસ્ટના મહાસચિવ ચંપતરાય અને ટ્રસ્ટી ડૉ. અનિલ મિશ્રાના રાજીનામા અંગે ચર્ચા થઈ શકે છે. ટ્રસ્ટના સભ્યો બહુમતીના આધારે અંતિમ નિર્ણય લેશે તેવી શક્યતા છે.
ટ્રસ્ટના અધ્યક્ષ મહંત નૃત્ય ગોપાલદાસની અધ્યક્ષતામાં યોજાનારી બેઠકની કાર્યવાહીનું સંચાલન પ્રથમ વખત કોષાધ્યક્ષ સ્વામી ગોવિંદ દેવ ગિરિ કરશે. બેઠકમાં ટ્રસ્ટના તમામ સભ્યોને હાજર રહેવા આમંત્રણ આપવામાં આવ્યું છે.
ચંપતરાય લાંબા સમયથી મંદિરના વહીવટી કાર્યો તેમજ જાહેર સંચારની જવાબદારી સંભાળી રહ્યા છે, જ્યારે ડૉ. અનિલ મિશ્રા ટ્રસ્ટના સક્રિય સભ્ય તરીકે વિવિધ જવાબદારીઓ નિભાવી રહ્યા છે. બંનેના રાજીનામા અંગે ટ્રસ્ટ શું નિર્ણય લે છે તેના પર સૌની નજર રહેશે.
શ્રી રામ જન્મભૂમિ તીર્થ ક્ષેત્ર ટ્રસ્ટમાં મહંત નૃત્ય ગોપાલદાસ (અધ્યક્ષ), ચંપતરાય (મહાસચિવ), સ્વામી ગોવિંદ દેવ ગિરિ (કોષાધ્યક્ષ), વરિષ્ઠ કાનૂની નિષ્ણાત કે. પરાસરન, મંદિર નિર્માણ સમિતિના અધ્યક્ષ નૃપેન્દ્ર મિશ્રા, ડૉ. અનિલ મિશ્રા, યુગપુરુષ પરમાનંદ ગિરિ, દિનેન્દ્ર દાસ, સ્વામી વાસુદેવાનંદ સરસ્વતી, સ્વામી વિશ્વપ્રસન્નતીર્થ, કૃષ્ણ મોહન અને અયોધ્યાના જિલ્લા મેજિસ્ટ્રેટ શશાંક ત્રિપાઠી સહિતના સભ્યોનો સમાવેશ થાય છે.
ચડાવા ચોરી પ્રકરણ બાદ ટ્રસ્ટની કામગીરી અને વહીવટી વ્યવસ્થા અંગે અનેક પ્રશ્નો ઊભા થયા છે. આવી સ્થિતિમાં આજની બેઠકમાં લેવાતા નિર્ણયો ટ્રસ્ટના આગામી વહીવટી માળખા અને કાર્યપદ્ધતિ માટે મહત્વપૂર્ણ સાબિત થઈ શકે છે.
