દાહોદ: દાહોદ જિલ્લાના ફતેપુરા તાલુકાના કાળીયા વલુન્ડા ગામે ખુલ્લા મેદાનમાં ચાલી રહેલા જુગારધામ પર પોલીસે સફળ દરોડો પાડી ચાર જુગારીઓને રંગેહાથ ઝડપી પાડ્યા છે. જ્યારે ત્રણ શખ્સો અંધારાનો લાભ લઈને સ્થળ પરથી ફરાર થઈ જવામાં સફળ રહ્યા હતા.
મળતી માહિતી મુજબ, ફતેપુરા પોલીસને બાતમી મળી હતી કે કાળીયા વલુન્ડા ગામની સીમમાં બાવળના ઝાડ નીચે ટોર્ચના અજવાળે કેટલાક લોકો જુગાર રમી રહ્યા છે. બાતમીના આધારે પોલીસ ટીમે મધરાતે ઓચિંતો દરોડો પાડ્યો હતો.
પોલીસને જોઈને જુગાર રમતા લોકોમાં નાસભાગ મચી ગઈ હતી. જોકે પોલીસ ચાર આરોપીઓને ઝડપી પાડવામાં સફળ રહી હતી, જ્યારે ત્રણ આરોપીઓ અંધારાનો લાભ લઈને ભાગી છૂટ્યા હતા.
દરોડા દરમિયાન પોલીસે જુગારના પટ પરથી રોકડા રૂપિયા 16,200 તેમજ ચાર એન્ડ્રોઇડ મોબાઇલ ફોન સહિત કુલ રૂપિયા 1.71 લાખથી વધુનો મુદ્દામાલ કબ્જે કર્યો હતો. પોલીસે પકડાયેલા તેમજ ફરાર તમામ સાત આરોપીઓ સામે જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે.
ફરાર આરોપીઓને ઝડપી પાડવા માટે પોલીસ દ્વારા અલગ-અલગ ટીમો કાર્યરત કરવામાં આવી છે. સમગ્ર કામગીરી પોલીસ ઇન્સ્પેક્ટર પી.એ. જાડેજાના માર્ગદર્શન હેઠળ હાથ ધરવામાં આવી હતી.
સ્થાનિક વિસ્તારમાં લાંબા સમયથી ચાલી રહેલી ગેરકાયદે પ્રવૃત્તિઓ સામે પોલીસની આ કાર્યવાહી બાદ અન્ય અસામાજિક તત્વોમાં પણ ફફડાટ ફેલાયો હોવાનું જાણવા મળે છે. પોલીસનું કહેવું છે કે જિલ્લામાં જુગાર અને અન્ય ગેરકાયદે પ્રવૃત્તિઓ સામે આવનારા દિવસોમાં પણ કડક કાર્યવાહી ચાલુ રહેશે.
