ફીફા વર્લ્ડ કપ 2026માં જર્મનીએ ધમાકેદાર અંદાજમાં પોતાના અભિયાનની શરૂઆત કરતા ડેબ્યૂ કરી રહેલી કુરાકાઓની ટીમને 7-1થી કરારી હાર આપી છે. આ જીત સાથે જર્મનીએ માત્ર ત્રણ પોઈન્ટ જ નથી મેળવ્યા, પરંતુ વર્લ્ડ કપના ઈતિહાસમાં એક એવો રેકોર્ડ પણ પોતાના નામે કરી લીધો છે, જે અત્યાર સુધી બ્રાઝિલના નામે હતો.
ગ્રુપ-ઈ ના મુકાબલામાં જર્મન ટીમ શરૂઆતથી જ સંપૂર્ણપણે હાવી જોવા મળી. ટીમે એ જ જૂની આક્રમક રમત બતાવી, જેના કારણે તે દુનિયાની સૌથી સફળ ફૂટબોલ ટીમોમાં ગણાય છે. રસપ્રદ વાત એ રહી કે જર્મનીએ ફરી એકવાર 7-1નો સ્કોર બનાવ્યો. આ રીતે 2014ના વર્લ્ડ કપની સેમિફાઇનલની યાદો તાજી થઈ ગઈ. તે મુકાબલામાં પણ જર્મનીએ બ્રાઝિલને 7-1થી હરાવીને ઈતિહાસ રચ્યો હતો.
જર્મનીએ બનાવ્યો ઐતિહાસિક રેકોર્ડ
કુરાકાઓ સામે સાત ગોલ ફટકારવાની સાથે જ જર્મની ફીફા વર્લ્ડ કપના ઇતિહાસમાં સૌથી વધુ ગોલ કરનારી ટીમ બની ગઈ છે. હવે જર્મનીના નામે વર્લ્ડ કપમાં કુલ 239 ગોલ થઈ ગયા છે, જ્યારે બ્રાઝિલ 238 ગોલ સાથે બીજા સ્થાને સરકી ગયું છે. હવે જર્મનીની નજર વર્લ્ડ કપના ઈતિહાસમાં 250 ગોલ પૂરા કરવા પર ટકેલી છે.
ફીફા વર્લ્ડ કપના ઇતિહાસમાં સૌથી વધુ ગોલ કરનારી ટીમો:
-
જર્મની – 239
-
બ્રાઝિલ – 238
-
આર્જેન્ટિના – 152
એટલું જ નહીં, આ ચોથી વખત છે જ્યારે જર્મનીએ કોઈપણ વર્લ્ડ કપ મેચમાં 7 કે તેથી વધુ ગોલ ફટકાર્યા હોય. આ પહેલા આ રેકોર્ડ હંગેરીના નામે હતો, જેણે ત્રણ વખત આવું પરાક્રમ કર્યું હતું.
વર્લ્ડ કપમાં જર્મનીની 7+ ગોલવાળી મેચો:
-
1954 – તુર્કી સામે 7-2
-
2002 – સાઉદી અરેબિયા સામે 8-0
-
2014 – બ્રાઝિલ સામે 7-1
-
2026 – કુરાકાઓ સામે 7-1
