ભારતીય શેરબજાર માટે આજનો દિવસ ભારે અસ્થિરતાથી ભરેલો રહ્યો હતો. એક તરફ અમેરિકી ડોલર સામે ભારતીય રૂપિયો 96 ના ઐતિહાસિક નીચલા સ્તરે પહોંચી જતા તેની સીધી નકારાત્મક અસર દલાલ સ્ટ્રીટ પર જોવા મળી હતી. વિદેશી રોકાણકારોની સતત વેચવાલી અને રૂપિયાની નબળાઈને કારણે રોકાણકારોના સેન્ટિમેન્ટ પર માઠી અસર પડી હતી.જેના પરિણામે બજાર લાલ નિશાનમાં બંધ થયું હતું.
BSE સેન્સેક્સ: 160.73 પોઈન્ટ (0.21%) ના ઘટાડા સાથે 75,237.99 પર બંધ.
NSE નિફ્ટી: 46.10 પોઈન્ટ (0.19%) ના ઘટાડા સાથે 23,643.50 ના સ્તરે પહોંચ્યો.
માર્કેટ બ્રેડ્થ: આજે બજારમાં વેચવાલીનું જોર વધુ હતું. કુલ 2,381 શેરોમાં ઘટાડો જોવા મળ્યો, જેની સામે માત્ર 1,631 શેરો જ વધારા સાથે બંધ થયા હતા.
IT અને મીડિયા સેક્ટરે બજારને ટેકો આપ્યો
બજારમાં સર્વાંગી ઘટાડા વચ્ચે પણ અમુક ક્ષેત્રોમાં તેજી જોવા મળી હતી:
IT સેક્ટર: સામાન્ય રીતે રૂપિયો નબળો પડે ત્યારે IT કંપનીઓને ફાયદો થાય છે, કારણ કે તેમની આવકનો મોટો હિસ્સો ડોલરમાં હોય છે. આ કારણે નિફ્ટી IT ઇન્ડેક્સ 1.3% વધીને બંધ થયો હતો.
મીડિયા સેક્ટર: મીડિયા ઇન્ડેક્સમાં પણ શાનદાર દેખાવ જોવા મળ્યો અને તે લગભગ 2% ના વધારા સાથે બંધ રહ્યો હતો.
બેંક અને મેટલ શેરોમાં જોરદાર વેચવાલી
બજારને નીચે ખેંચવામાં સરકારી બેંકો અને મેટલ સેક્ટરે મુખ્ય ભૂમિકા ભજવી હતી:
PSU બેંક્સ: નિફ્ટી પીએસયુ બેંક ઇન્ડેક્સ 1.8% ગબડ્યો હતો.
ઓઈલ-ગેસ અને રિયલ્ટી: આ સેક્ટરમાં અનુક્રમે 1.67% અને 1.79% નો ઘટાડો નોંધાયો હતો.
મેટલ સેક્ટર: આજે મેટલ શેરો પર સૌથી વધુ દબાણ હતું. હિંડાલ્કો, ટાટા સ્ટીલ અને JSW સ્ટીલ જેવા મોટા શેરો તૂટતા નિફ્ટી મેટલ ઇન્ડેક્સ 1.93% નીચે આવ્યો હતો.
બજારના નિષ્ણાતોના જણાવ્યા અનુસાર, ડોલરની મજબૂતી અને રૂપિયાની નબળાઈને કારણે ક્રૂડ ઓઈલની આયાત મોંઘી થઈ રહી છે. આનાથી દેશમાં ફુગાવો (મોંઘવારી) વધવાનો ડર ઉભો થયો છે. જેના કારણે રોકાણકારોએ પ્રોફિટ બુકિંગ (નફો વસૂલવાનું) પસંદ કર્યું હતું. જોકે, IT સેક્ટરમાં આવેલી તેજીએ બજારને વધુ મોટો કડાકો બોલતા બચાવી લીધું હતું.રૂપિયાનું મૂલ્ય ઘટવું એ નિકાસલક્ષી કંપનીઓ (જેમ કે IT અને ફાર્મા) માટે વરદાન સાબિત થાય છે. પરંતુ આયાત પર નિર્ભર સેક્ટર્સ (જેમ કે ઓઈલ અને મેટલ) માટે મુશ્કેલી ઊભી કરે છે.
