વડાપ્રધાન નરેન્દ્ર મોદીએ આજે ઉત્તર ગુજરાતના વાવ અને થરાદના નાણી ખાતે આયોજિત ભવ્ય જનસભામાં વિરોધ પક્ષ કોંગ્રેસની આકરી ઝાટકણી કાઢી હતી. તેમણે સ્પષ્ટ શબ્દોમાં જણાવ્યું કે, જ્યારે વિશ્વ યુદ્ધ જેવી કપરી સ્થિતિમાં છે અને ભારત મક્કમતાથી આગળ વધી રહ્યું છે, ત્યારે કોંગ્રેસ માત્ર અફવાઓ ફેલાવી દેશને ગેરમાર્ગે દોરવાનું પાપ કરી રહી છે.
“કોંગ્રેસે કપડાં પણ ઉતારી દીધા!” PM મોદીએ દિલ્હીની AI સમિટ દરમિયાન બનેલી ઘટનાનો ઉલ્લેખ કરતા કહ્યું કે, “કોંગ્રેસ હાલ એટલી હદે ગભરાઈ ગઈ છે કે વિરોધ કરવા માટે તેમણે પોતાની મર્યાદાઓ અને કપડાં પણ ઉતારી દીધા છે. આ લોકો વિદેશી તાકતોને ફાયદો થાય તેવી વાતો કરીને દેશમાં ભાગલા પડાવવાનું કામ કરી રહ્યા છે.”
મુખ્યમંત્રી અને દિગ્ગજ નેતાઓએ ગણાવ્યા વિકાસના કામો
CM ભૂપેન્દ્ર પટેલ: વિકાસનો નવો અધ્યાય મુખ્યમંત્રીએ જણાવ્યું કે, વડાપ્રધાને કુશળ વહીવટ દ્વારા મોંઘવારી પર અંકુશ રાખ્યો છે. ખાસ કરીને વૈશ્વિક સંકટ વચ્ચે પણ પેટ્રોલ-ડીઝલના ભાવ કાબૂમાં રાખી સામાન્ય જનતાને રાહત આપી છે. ભૂતકાળમાં મહિલાઓએ પાણી માટે માઈલો સુધી ભટકવું પડતું, પણ આજે ‘નલ સે જલ’ દ્વારા તે સમસ્યા ભૂતકાળ બની ગઈ છે.
શંકરભાઈ ચૌધરી: સરહદ હવે સુરક્ષિત અને સમૃદ્ધ વિધાનસભા અધ્યક્ષે બનાસકાંઠાની કાયાપલટ વિશે વાત કરતા કહ્યું કે, જે વિસ્તારમાં પાણી માટે હિજરત થતી હતી, ત્યાં આજે નર્મદાના નીર અને ‘સુજલામ સુફલામ’ યોજનાથી હરિયાળી લહેરાય છે. વિરોધ પક્ષોના અવરોધ છતાં 5 હજાર કરોડના ખર્ચે તળાવો ભરીને ખેડૂતોને સમૃદ્ધ કર્યા છે.
હર્ષ સંઘવી: છેવાડાના માનવી સુધી પહોંચ્યો લાભ હર્ષ સંઘવીએ જણાવ્યું કે ઉત્તર ગુજરાતના પશુપાલકો અને મહિલાઓ આજે આત્મનિર્ભર બની છે. સરકાર 39 હજારથી વધુ પાકા મકાનો અને ખેડૂતોના ખાતામાં સીધા જ વર્ષે 6 હજાર રૂપિયા જમા કરાવીને ગરીબ કલ્યાણના સંકલ્પને સાકાર કરી રહી છે.
મુખ્ય અંશો:
-
વૈશ્વિક પ્રભાવ: યુદ્ધ જેવી સ્થિતિમાં પણ ભારતની અર્થવ્યવસ્થા સુરક્ષિત.
-
જડબાતોડ જવાબ: કોંગ્રેસની નકારાત્મક રાજનીતિ અને ભાગલાવાદી નીતિનો પર્દાફાશ.
-
બનાસની કાયાપલટ: નર્મદાની નહેર અને સુઈગામ જેવા સરહદી વિસ્તારોમાં પ્રવાસનનો વિકાસ.
-
આત્મનિર્ભરતા: પાકા મકાનો અને ખેડૂત કલ્યાણની યોજનાઓનો સીધો અમલ.
