રાજ્યસભામાં બુધવારે ટ્રાન્સજેન્ડર સમુદાય માટે લાવવામાં આવેલા નવા બિલ પર ચર્ચા દરમિયાન જોરદાર હંગામો જોવા મળ્યો હતો. સમાજવાદી પાર્ટીના સાંસદ જયા બચ્ચન પોતાની વાત રજૂ કરતી વખતે ગૃહમાં હાજર અન્ય સભ્યોના વર્તનથી અત્યંત નારાજ થઈ ગયા હતા અને તેમની સીધી દલીલ સ્પીકર સાથે થઈ હતી. જયા બચ્ચને પોતાની નારાજગી વ્યક્ત કરતા ડેપ્યુટી ચેરમેન પેનલના દિનેશ શર્માને ત્યાં સુધી કહી દીધું કે, “જેટલો સમય આપવો હોય એટલો આપો અથવા ફાંસીએ ચઢાવી દો.”
ગૃહમાં તીખી નોકઝોક અને જયાની નારાજગી
આ સમગ્ર વિવાદ ત્યારે શરૂ થયો જ્યારે જયા બચ્ચન ભાષણ આપી રહ્યા હતા અને સત્તા પક્ષના કેટલાક સભ્યો અંદરોઅંદર વાતચીત કરી રહ્યા હતા, જેના કારણે તેમનું ધ્યાન ભટક્યું હતું. જયા બચ્ચને જેવું રામનવમીની શુભેચ્છા પાઠવીને પોતાનું ભાષણ શરૂ કર્યું, અન્ય સાંસદોની વાતચીતથી તેઓ અટકી ગયા અને સ્પીકર સામે જોવા લાગ્યા.
જ્યારે સ્પીકરે તેમને બોલવાનું ચાલુ રાખવા કહ્યું, ત્યારે જયા બચ્ચને કટાક્ષ કરતા કહ્યું કે, “તમે નબળા લોકોને ફાંસી પર ચઢાવી જ રહ્યા છો.” તેમણે સ્પીકરને એમ પણ કહ્યું કે જો સભ્યો તમારી વાત નથી સાંભળી રહ્યા, તો તમે તેમની સામે કાર્યવાહી કેમ નથી કરતા? આ ચર્ચા એટલી વધી ગઈ કે જયા બચ્ચને ગૃહના ‘વેલ’માં જવાની ચેતવણી પણ આપી દીધી હતી, જેના કારણે વાતાવરણ તંગ બની ગયું હતું.
