વિશ્વના સૌથી ચર્ચિત નેતા અને અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે ફરી એકવાર સોશિયલ મીડિયા પર વિવાદોનું વંટોળ ઊભું કર્યું છે…આ વખતે ટ્રમ્પે કોઈ રાજકીય નિવેદન નહીં, પરંતુ પોતાની એક એવી ‘એઆઈ-જનરેટેડ’ (AI) તસવીર શેર કરી છે જેમાં તેઓ ઈસુ ખ્રિસ્તના અવતારમાં જોવા મળી રહ્યા છે. આ કૃત્યથી ધાર્મિક સંગઠનોમાં રોષ ફાટી નીકળ્યો છે અને વેટિકન સિટીના સર્વોચ્ચ ધર્મગુરુ સાથેના તેમના સંબંધો વણસ્યા છે.
શું છે વિવાદાસ્પદ તસવીરમાં?
આર્ટિફિશિયલ ઈન્ટેલિજન્સ દ્વારા તૈયાર કરવામાં આવેલી આ તસવીરમાં ટ્રમ્પ એક બીમાર વ્યક્તિ પર હાથ મૂકીને તેને ચમત્કારિક રીતે સાજો કરતા દેખાય છે. આ દ્રશ્ય બાઈબલમાં વર્ણવેલ ઈસુ ખ્રિસ્તના પવિત્ર ચમત્કારોની યાદ અપાવે છે. તસવીરની પૃષ્ઠભૂમિમાં અમેરિકન ધ્વજ અને સૈન્ય વિમાનો પણ દર્શાવવામાં આવ્યા છે, જે ટ્રમ્પની ‘મસીહા’ અને ‘રાષ્ટ્રવાદી’ છબીને મિશ્રિત કરવાનો પ્રયાસ હોવાનું મનાય છે.
પોપ લિયો સામે સીધો જંગ
તસવીર પોસ્ટ કરતા પહેલા ટ્રમ્પે કેથોલિક ચર્ચના સર્વોચ્ચ ધર્મગુરુ પોપ લિયો XIV પર આકરા પ્રહારો કર્યા હતા. ટ્રમ્પે તેમને ‘ગુનાખોરી સામે નબળા’ અને ‘અમેરિકાની વિદેશ નીતિ માટે જોખમી’ ગણાવ્યા છે. ટ્રમ્પનો આરોપ છે કે પોપનું વલણ રાજકીય પક્ષપાતથી પ્રેરિત છે અને તેઓ ઈરાન જેવા દેશો પ્રત્યે નરમ વલણ ધરાવે છે.
ધર્મ અને રાજકારણનો ટકરાવ
આ વિવાદ પાછળનું મુખ્ય કારણ પોપ લિયો દ્વારા તાજેતરમાં વોશિંગ્ટનની યુદ્ધનીતિઓની કરવામાં આવેલી ટીકા છે. તેના જવાબમાં ટ્રમ્પે સ્પષ્ટ કર્યું છે કે, “હું એવા કોઈ ધર્મગુરુને સ્વીકારી શકું નહીં જે ઈરાનના પરમાણુ હથિયારોના ખતરા સામે મૌન રહે.” નિષ્ણાતો માને છે કે ટ્રમ્પ આ પ્રકારની હરકતો દ્વારા પોતાના કટ્ટર સમર્થકોને રિઝવવાની અને વિરોધીઓને ઉશ્કેરવાની રણનીતિ અપનાવી રહ્યા છે.
