સેવા તીર્થથી જનકલ્યાણનો શુભારંભ: પીએમ મોદીના પ્રથમ નિર્ણયોમાં ખેડૂતો, મહિલાઓ અને અકસ્માત પીડિતો માટે યોજનાઓની લહાણી.

વડાપ્રધાન નરેન્દ્ર મોદીએ શુક્રવાર અને 13 ફેબ્રુઆરીએ નવા પ્રધાનમંત્રી કાર્યાલય,”સેવા તીર્થ”નું ઉદ્ઘાટન કર્યું.તેમણે તેમના નવા કાર્યકાળના પ્રથમ નિર્ણયો પર પણ હસ્તાક્ષર કર્યા..જેમાં સેવાની ભાવનાને પ્રાથમિકતા આપવાનો સંદેશ આપવામાં આવ્યો.આજે હસ્તાક્ષર કરાયેલા નિર્ણયોનો હેતુ સમાજના દરેક વર્ગ-મહિલાઓ, યુવાનો, ખેડૂતો અને નબળા જૂથોને સશક્ત બનાવવાનો છે. પ્રધાનમંત્રી કાર્યાલય દ્વારા જાહેર કરાયેલી માહિતી અનુસાર આ પહેલ સામાજિક સુરક્ષા, આર્થિક સશક્તિકરણ અને નવીનતાને નવી ગતિ આપશે.

પીએમ રાહત યોજના: દરેક નાગરિક માટે જીવનરક્ષક સુરક્ષા

પીએમ રાહત યોજના શરૂ કરવાને વડાપ્રધાને મંજૂરી આપી છે. આ યોજના હેઠળ, માર્ગ અકસ્માત પીડિતોને ₹1.5 લાખ સુધીની રોકડ રહિત સારવાર મળશે.તેનો ઉદ્દેશ્ય એ સુનિશ્ચિત કરવાનો છે કે તાત્કાલિક તબીબી સહાયના અભાવે કોઈ પણ વ્યક્તિ પોતાનો જીવ ન ગુમાવે.

‘લખપતિ દીદી’નો લક્ષ્યાંક બમણો કરીને 6 કરોડ કરવામાં આવ્યો

સરકારે માર્ચ 2027 ના લક્ષ્યાંક તારીખથી એક વર્ષ પહેલા 3 કરોડ લખપતિ દીદીઓનું લક્ષ્યાંક હાંસલ કરી લીધું છે. હવે, વડાપ્રધાને માર્ચ 2029 સુધીમાં 6 કરોડ લખપતિ દીદી બનાવવાનું નવું લક્ષ્યાંક નક્કી કર્યું છે. આ મહિલાઓની આર્થિક સ્વનિર્ભરતાને મજબૂત બનાવવા તરફ એક મોટું પગલું માનવામાં આવે છે.

ખેડૂતોને મોટો ફાયદો: કૃષિ માળખાગત ભંડોળ બમણું

સરકારે કૃષિ માળખાગત ભંડોળ ₹1 લાખ કરોડથી વધારીને ₹2 લાખ કરોડ કરવાની મંજૂરી આપી છે.તેનો ઉદ્દેશ્ય કૃષિ મૂલ્ય શૃંખલાને મજબૂત બનાવવા, સંગ્રહ અને પુરવઠા પ્રણાલીમાં સુધારો કરવાનો અને ખેડૂતોની આવક વધારવાનો છે.

સ્ટાર્ટઅપ ઇન્ડિયા ફંડ ઓફ ફંડ્સ 2.0

નવીનતા અને ટેકનોલોજીકલ વિકાસને પ્રોત્સાહન આપવા માટે ₹10,000 કરોડના ભંડોળ સાથે સ્ટાર્ટઅપ ઇન્ડિયા ફંડ ઓફ ફંડ્સ 2.0 ને મંજૂરી આપવામાં આવી છે.આ પહેલ ડીપ ટેક, એડવાન્સ્ડ મેન્યુફેક્ચરિંગ અને પ્રારંભિક તબક્કાના સ્ટાર્ટઅપ્સને નાણાકીય સહાય પૂરી પાડશે.સરકાર માને છે કે આ ભારતના નવીનતા ઇકોસિસ્ટમને વધુ મજબૂત બનાવશે અને યુવાનો માટે નવી તકો ઊભી કરશે.