ડ્રોન અને મિસાઈલ હુમલાના સતત ખતરા વચ્ચે ક્રૂના જીવ પર જોખમ; સુરક્ષિત રેસ્ક્યૂ માટે ભારત સરકારને તાત્કાલિક હસ્તક્ષેપની માંગ
નવી દિલ્હી: યુક્રેનના ચોર્નોમોર્સ્ક બંદર નજીક યુદ્ધગ્રસ્ત વિસ્તારમાં ઉભેલા ‘MV AMIR1’ કાર્ગો જહાજ પર 13 ભારતીય ખલાસીઓ સહિત કુલ 15 ક્રૂ સભ્યો ફસાઈ ગયા હોવાની માહિતી સામે આવી છે. રશિયા-યુક્રેન યુદ્ધ વચ્ચે બંદર વિસ્તાર પર સતત ડ્રોન અને મિસાઈલ હુમલાઓ થતાં ખલાસીઓના જીવ પર ગંભીર જોખમ ઊભું થયું છે.
**ફોરવર્ડ સીમેન્સ યુનિયન ઓફ ઈન્ડિયા (FSUI)**ના જણાવ્યા અનુસાર જહાજની આસપાસ સતત વિસ્ફોટો અને હુમલાની ઘટનાઓ બની રહી છે. આવી પરિસ્થિતિમાં ક્રૂ સભ્યો જહાજમાંથી બહાર નીકળી શકતા નથી અને સુરક્ષિત સ્થળે પહોંચવાનો કોઈ માર્ગ પણ ઉપલબ્ધ નથી.
યુનિયને ભારત સરકાર, જહાજના સંચાલકો અને ફ્લેગ સ્ટેટને તાત્કાલિક હસ્તક્ષેપ કરીને તમામ ભારતીય ખલાસીઓને સુરક્ષિત રીતે બહાર કાઢવા અને વતન પરત લાવવા અપીલ કરી છે.
ઉલ્લેખનીય છે કે થોડા સમય પહેલાં જ બ્લેક સીમાં વેપારી જહાજ ‘MV OMORFI’ પર થયેલા હુમલામાં એક ભારતીય ખલાસીનું મોત થયું હતું. તે ઘટનાના પગલે ભારતના વિદેશ મંત્રાલયે વ્યાપારી જહાજો પર થતા હુમલાઓ અંગે ગંભીર ચિંતા વ્યક્ત કરી હતી અને નાગરિકોની સુરક્ષા સુનિશ્ચિત કરવાની માંગ સાથે યુક્રેન સમક્ષ સખત વિરોધ નોંધાવ્યો હતો.
વર્તમાન ઘટનાએ ફરી એકવાર યુદ્ધગ્રસ્ત વિસ્તારોમાં કાર્યરત ભારતીય ખલાસીઓની સુરક્ષાનો મુદ્દો ગંભીર બનાવ્યો છે. હવે તમામની નજર ભારત સરકાર દ્વારા હાથ ધરાનારી બચાવ કાર્યવાહી અને રાજદ્વારી પ્રયાસો પર કેન્દ્રિત થઈ છે.
