દ્વારકા, જામનગર અને રાજકોટ જિલ્લામાં માત્ર હળવા ઝાપટા; વરસાદની અછતથી ખેતી અને પશુપાલન પર સંકટ
રાજકોટ: સૌરાષ્ટ્રમાં ચોમાસું હજુ પણ પૂરેપૂરું સક્રિય બન્યું નથી. રવિવારે રાજકોટ, જામનગર અને દેવભૂમિ દ્વારકા જિલ્લાના કેટલાક વિસ્તારોમાં હળવા ઝાપટા પડ્યા હતા, જ્યારે અન્ય વિસ્તારોમાં દિવસભર વાદળછાયું વાતાવરણ છવાયેલું રહ્યું હતું. જોકે નોંધપાત્ર વરસાદ ન થતાં ખેડૂતોની ચિંતા વધુ ઘેરી બની રહી છે.
દેવભૂમિ દ્વારકા જિલ્લામાં ચોમાસાની ભારે અછત વચ્ચે રવિવારે બપોરે દ્વારકા શહેરમાં માત્ર પાંચેક મિનિટ માટે વરસાદ વરસ્યો હતો. ટૂંકા સમયના વરસાદથી ગરમીમાં ખાસ રાહત મળી નહોતી, પરંતુ ભેજ વધતાં ઉકળાટમાં વધારો થયો હતો. વરસાદ બંધ થતાં ફરી એકવાર લોકો ગરમી અને ગૂંગળામણનો અનુભવ કરવા મજબૂર બન્યા હતા.
વરસાદની અનિશ્ચિત સ્થિતિને કારણે ખેડૂતો મૂંઝવણમાં મુકાયા છે. ઘણા ખેડૂતોએ વરસાદની આશાએ વાવણી કરી દીધી છે, જ્યારે કેટલાકે ખેતરો તૈયાર રાખ્યા છે. પરંતુ પૂરતા વરસાદના અભાવે પાકના વિકાસ પર અસર થવાની ભીતિ સેવાઈ રહી છે. પશુઓ માટે ઘાસચારાની ઉપલબ્ધિ પણ આગામી દિવસોમાં પડકારરૂપ બની શકે તેવી સ્થિતિ ઊભી થઈ રહી છે.
જામનગર જિલ્લામાં છેલ્લા 48 કલાક દરમિયાન જોડીયા અને જામજોધપુર તાલુકામાં 4-4 મીમી તેમજ લાલપુરમાં 5 મીમી વરસાદ નોંધાયો હતો. જામનગર શહેરમાં પણ દિવસભર વાદળોની અવરજવર વચ્ચે માત્ર અમી છાંટા પડ્યા હતા. શહેરમાં મહત્તમ અને લઘુત્તમ તાપમાન 27 ડિગ્રી સેલ્સિયસ નોંધાયું હતું, જ્યારે હવામાં ભેજનું પ્રમાણ 82 ટકા અને પવનની ગતિ પ્રતિ કલાક 12.5 કિલોમીટર નોંધાઈ હતી.
રાજકોટ સહિત સૌરાષ્ટ્રના મોટા ભાગના વિસ્તારોમાં વાદળછાયું વાતાવરણ હોવા છતાં મેઘરાજા મન મૂકીને વરસ્યા નથી. વરસાદની સતત અછતને કારણે ખેડૂતો હવે આગામી દિવસોમાં સારા વરસાદની આશા સાથે આકાશ તરફ મીટ માંડી રહ્યા છે. હાલની સ્થિતિએ સૌરાષ્ટ્રમાં ચોમાસાની ગતિ હજુ પણ નબળી જ જોવા મળી રહી છે.
