બોડેલીના ભરબજારમાં વીજ કરંટ લાગતાં આખલાનું કમકમાટીભર્યું મોત; તંત્રની બેદરકારી સામે લોકરોષ

છોટાઉદેપુર જિલ્લાના બોડેલી નગરમાંથી એક ચોંકાવનારી ઘટના સામે આવી છે. જ્યાં મુખ્ય બજારની મધ્યમાં એક આખલાનું શંકાસ્પદ રીતે વીજ કરંટ લાગવાને કારણે કમકમાટીભર્યું મોત નીપજ્યું છે. ગત રાત્રિ દરમિયાન વિસ્તારમાં ત્રાટકેલા તીવ્ર વાવાઝોડા અને ભારે વરસાદને કારણે વીજળીના થાંભલામાં લાઈવ કરંટ ઉતરી આવ્યો હોવાની પ્રબળ આશંકા વ્યક્ત કરવામાં આવી રહી છે. ધોળા દિવસે ભરબજારમાં બનેલી આ ઘટનાને પગલે સમગ્ર પંથકમાં ચકચાર મચી ગઈ છે. અને સ્થાનિક લોકોમાં ભારે આક્રોશ જોવા મળી રહ્યો છે.

ભરચક લોકચળવળ ધરાવતા બજાર વિસ્તારમાં આ પ્રકારે વીજ કરંટ ઉતરવાની ઘટનાથી સ્થાનિક વેપારીઓ, રાહદારીઓ અને વાહનચાલકોમાં ભયનો માહોલ વ્યાપી ગયો છે. ધોધમાર વરસાદ બાદ તંત્રની પ્રી-મોન્સૂન કામગીરીની પોલ ખુલ્લી પડી ગઈ હોય તેમ લોકોમાં ચિંતા સેવાઈ રહી છે કે, જો આ જગ્યાએ કોઈ નિર્દોષ નાગરિક કે બાળક હોત તો મોટી જાનહાનિ થઈ શકી હોત. ઘટનાની ગંભીરતાને જોતાં સ્થાનિકો દ્વારા MGVCL (વીજ કંપની)ના સત્તાધીશો સામે તાત્કાલિક તપાસની માંગ કરવામાં આવી છે. તેમજ બજારના તમામ ક્ષતિગ્રસ્ત વાયરિંગ અને વીજ વ્યવસ્થાને સત્વરે દુરસ્ત કરવા દબાણ વધ્યું છે.

બીજી તરફ, ઘટનાની જાણ થતાં જ નગરપાલિકાની ટીમ તાત્કાલિક એક્શનમાં આવી હતી અને રાહત બચાવની કામગીરી શરૂ કરી હતી. નગરપાલિકાના કર્મચારીઓએ ઘટનાસ્થળે પહોંચી જેસીબી (JCB) મશીનની મદદથી ભારે જહેમત બાદ બળદના મૃતદેહને બજારમાંથી સુરક્ષિત રીતે બહાર કાઢી અન્યત્ર ખસેડ્યો હતો. જેથી વાહનવ્યવહાર પૂર્વવત થઈ શકે. હાલ પૂરતો વીજ પ્રવાહ નિયંત્રિત કરીને આગળની કાર્યવાહી હાથ ધરવામાં આવી છે.

– રિપોર્ટર: અંજુમ ખત્રી, છોટાઉદેપુર