આણંદના વિદ્યાનગર વિસ્તારમાં આવેલા રુદ્રાક્ષ કોર્નર નજીક આવેલી ‘અંજલિ ફાસ્ટફૂડ’ (મગ પુલાવ)ની દુકાનમાં સવારના સમયે અચાનક આગ ભભૂકી ઊઠવાની ઘટના સામે આવી છે. ગેસ સિલિન્ડરમાં લીકેજના કારણે લાગેલી આ ભીષણ આગમાં બે દુકાનો ઝપેટમાં આવી ગઈ હતી, જેના કારણે સમગ્ર વિસ્તારમાં અફરાતફરી મચી ગઈ હતી.
સવારે અચાનક ગેસ લીકેજથી ફાટી નીકળી આગ
-
બનાવની વિગત: સવારે આશરે 8:30 વાગ્યાની આસપાસ ગેસ સિલિન્ડરની નોઝલમાં લીકેજ થવાના કારણે અચાનક આગ લાગી હતી.
-
ભારે માલસામાન ખાખ: આગ એટલી વિકરાળ હતી કે દુકાનનું કાઉન્ટર, ફ્રિજ, શાકભાજી સહિત અન્ય માલસામાન બળીને ભસ્મીભૂત થઈ ગયો હતો.
-
સિલિન્ડરનો ભય: દુકાન અંદર 5થી વધુ ગેસ સિલિન્ડર હોવાથી મોટી દુર્ઘટનાનો ભય સર્જાયો હતો, પરંતુ કારીગરોના સમયસૂચકતાભર્યા બચાવ અને ફાયર બ્રિગેડની કામગીરીથી મોટી જાનહાનિ ટળી હતી.
ફાયર ટીમ અને પોલીસની કામગીરી
-
વિસ્તાર કોર્ડન કરાયો: ઘટનાની જાણ થતાં જ વિદ્યાનગર પોલીસ ઘટનાસ્થળે પહોંચી ગઈ હતી અને સુરક્ષાના ભાગરૂપે આસપાસનો વિસ્તાર કોર્ડન કરી લીધો હતો.
-
આગ પર કાબૂ: ફાયર બ્રિગેડની ટીમે સ્થળ પર પહોંચીને ભારે જહેમત બાદ આગ પર સંપૂર્ણ કાબૂ મેળવ્યો હતો.
-
₹1.50 લાખનું નુકસાન: પ્રાથમિક અંદાજ મુજબ દુર્ઘટનામાં ₹1.50 લાખથી વધુનું આર્થિક નુકસાન થયું છે. હાલમાં પોલીસ અને ફાયર વિભાગ દ્વારા આગનું ચોક્કસ કારણ જાણવા તપાસ હાથ ધરવામાં આવી છે.
