ટ્રાન્સપોર્ટ વેપારીને અપહરણ બાદ જાનથી મારી નાખવાની ધમકી આપી વસૂલાઈ કરોડોની ખંડણી; CCTV અને ટેક્નિકલ સર્વેલન્સથી ગૂંચવણભર્યો કેસ ઉકેલાયો
ગાંધીધામ: કચ્છના ગાંધીધામમાં ટ્રાન્સપોર્ટ વેપારીના અપહરણ અને કરોડોની ખંડણીના કેસમાં પોલીસે મોટી સફળતા મેળવી છે. વેપારીનું અપહરણ કરી જાનથી મારી નાખવાની ધમકી આપીને ખંડણી વસૂલનાર ગેંગના 7 આરોપીઓની ધરપકડ કરવામાં આવી છે, જ્યારે 3 આરોપીઓ હજુ ફરાર હોવાનું સામે આવ્યું છે.
તપાસ દરમિયાન ખુલાસો થયો છે કે આરોપીઓએ વેપારી પાસેથી દુબઈ સ્થિત વૉલેટમાં ₹5.55 કરોડના USDT (ક્રિપ્ટો કરન્સી) ટ્રાન્સફર કરાવ્યા હતા. ડિજિટલ ટ્રાન્ઝેક્શનના આધારે પોલીસે સમગ્ર નાણાકીય કડી શોધી કાઢી છે.
આ કેસ ઉકેલવામાં CCTV ફૂટેજ, ટેક્નિકલ સર્વેલન્સ અને સાયબર ટ્રેકિંગ મહત્વપૂર્ણ સાબિત થયા હતા. વિવિધ પુરાવાના આધારે પોલીસે અલગ-અલગ સ્થળોએ દરોડા પાડી આરોપીઓને ઝડપી લીધા હતા.
પોલીસે જણાવ્યું છે કે ફરાર ત્રણ આરોપીઓને ઝડપી પાડવા માટે વિશેષ ટીમો કાર્યરત છે. સાથે જ સમગ્ર અપહરણ-ખંડણી રેકેટ અને તેની આંતરરાષ્ટ્રીય કડીઓની દિશામાં પણ તપાસ વધુ સઘન બનાવવામાં આવી છે.
