ચેન્નાઈ-તિરુચિરાપલ્લી રૂટ પર સર્જાઈ મોટી દુર્ઘટના; પળવારમાં બસ આગના ગોળામાં ફેરવાઈ, કોઈ જાનહાનિ નહીં
પેરમ્બલુર (તમિલનાડુ): તમિલનાડુના પેરમ્બલુર નજીક ચેન્નાઈ-તિરુચિરાપલ્લી નેશનલ હાઇવે પર દોડતી ખાનગી સ્લીપર બસમાં અચાનક ભીષણ આગ ભભૂકી ઊઠતાં મુસાફરોમાં ચકચાર મચી ગઈ હતી. જોકે બસના ડ્રાઇવરે સમયસર નિર્ણય લઈને તમામ 23 મુસાફરોને સુરક્ષિત રીતે બહાર કાઢી લેતાં મોટી જાનહાનિ ટળી હતી.
પ્રાપ્ત માહિતી મુજબ, બસ હાઇવે પર પૂરઝડપે દોડી રહી હતી ત્યારે પાછળના ભાગમાંથી ધુમાડો નીકળતો જોવા મળ્યો હતો. સ્થિતિની ગંભીરતા સમજી ડ્રાઇવરે તરત જ બસને રોડની બાજુમાં ઊભી રાખી તમામ મુસાફરોને બહાર નીકળવા સૂચના આપી હતી. મુસાફરો નીચે ઉતરતાની સાથે જ આગે વિકરાળ સ્વરૂપ ધારણ કર્યું અને આખી બસ આગની લપેટમાં આવી ગઈ હતી.
ઘટનાની જાણ થતાં ફાયર બ્રિગેડની ટીમ તાત્કાલિક સ્થળે પહોંચી આગ પર કાબૂ મેળવવાની કામગીરી હાથ ધરી હતી. ભારે જહેમત બાદ આગ બુઝાવવામાં સફળતા મળી હતી, પરંતુ ત્યાં સુધીમાં બસ સંપૂર્ણપણે બળીને ખાખ થઈ ગઈ હતી.
પ્રાથમિક તપાસમાં શોર્ટ સર્કિટ અથવા ટેકનિકલ ખામીના કારણે આગ લાગી હોવાની શક્યતા વ્યક્ત કરવામાં આવી રહી છે. ઘટનામાં કોઈ જાનહાનિ કે ઇજા નોંધાઈ નથી. પોલીસે અને ફાયર વિભાગે આગ લાગવાના ચોક્કસ કારણ અંગે તપાસ શરૂ કરી છે.
અધિકારીઓએ જણાવ્યું હતું કે ડ્રાઇવરની સતર્કતા અને ઝડપી નિર્ણયને કારણે મોટી દુર્ઘટના ટળી હતી અને તમામ મુસાફરો સુરક્ષિત બચી ગયા હતા.
