રાજોરીના તારકુંડી સેક્ટરમાં રાત્રે દોઢ કલાક સુધી ગોળીબાર; LoC પર સુરક્ષા વધુ સઘન
શ્રીનગર: જમ્મુ-કાશ્મીરના રાજોરી જિલ્લામાં નિયંત્રણ રેખા (LoC) નજીક પાકિસ્તાન તરફથી થયેલા શંકાસ્પદ ઘુસણખોરીના પ્રયાસને ભારતીય બોર્ડર સુરક્ષા દળ (BSF)એ નિષ્ફળ બનાવ્યો છે. સરહદ પર શંકાસ્પદ હિલચાલ નજરે પડતાં જવાનોની સતર્કતાના કારણે સંભવિત ઘુસણખોરોને ભારતીય સીમામાં પ્રવેશતા પહેલાં જ પાછા ખદેડી દેવામાં આવ્યા હતા.
સુરક્ષા એજન્સીઓના જણાવ્યા મુજબ, રાજોરી જિલ્લાના તારકુંડી સેક્ટરમાં રાત્રિના સમયે કેટલાક શંકાસ્પદ લોકો સરહદ તરફ આગળ વધી રહ્યા હોવાનું થર્મલ સર્વેલન્સ અને પેટ્રોલિંગ દરમિયાન જાણવા મળ્યું હતું. જવાનોએ પ્રથમ તેમને રોકાવા અને આત્મસમર્પણ કરવા માટે ચેતવણી આપી હતી, પરંતુ કોઈ પ્રતિસાદ ન મળતાં રાત્રે આશરે 10 વાગ્યે જવાબી કાર્યવાહી તરીકે ગોળીબાર કરવામાં આવ્યો હતો.
ત્યારબાદ બંને તરફથી આશરે દોઢ કલાક સુધી ગોળીબાર ચાલ્યો હતો. સુરક્ષા દળોના દબાણ બાદ શંકાસ્પદ ઘુસણખોરો પાકિસ્તાન અધિકૃત કાશ્મીર (PoK) તરફ પાછા ફર્યા હોવાનું પ્રાથમિક તપાસમાં સામે આવ્યું છે.
ઘટના બાદ સમગ્ર વિસ્તારમાં સર્ચ ઓપરેશન હાથ ધરવામાં આવ્યું છે તેમજ LoC પર વધારાના જવાનો તૈનાત કરીને સુરક્ષા વ્યવસ્થા વધુ મજબૂત બનાવવામાં આવી છે. ઘુસણખોરોનો કોઈ જૂથ ભારતીય વિસ્તારમાં પ્રવેશ્યો હતો કે નહીં તે અંગે પણ તપાસ ચાલુ છે.
સુરક્ષા સૂત્રોના જણાવ્યા મુજબ, આતંકી સંગઠનો વારંવાર રાત્રિના અંધકાર અને દુર્ગમ પહાડી વિસ્તારનો લાભ લઈને ઘુસણખોરીનો પ્રયાસ કરતા રહે છે. જોકે ભારતીય સુરક્ષા દળોની સતત સતર્કતા, આધુનિક સર્વેલન્સ સિસ્ટમ અને મજબૂત સરહદી સુરક્ષા વ્યવસ્થાને કારણે આવા પ્રયાસો મોટાભાગે નિષ્ફળ સાબિત થઈ રહ્યા છે.
