કચ્છ: દેશની દરિયાઈ સરહદોની સુરક્ષાને ધ્યાનમાં રાખીને કચ્છના દરિયાકાંઠા વિસ્તારમાં મરીન કમાન્ડો દ્વારા વિશેષ સઘન પેટ્રોલિંગ હાથ ધરવામાં આવ્યું છે. પીપરથી રોડાસર સુધીના સંવેદનશીલ દરિયાકાંઠા વિસ્તારમાં 5 કિલોમીટરથી વધુનું ફૂટ પેટ્રોલિંગ કરીને સુરક્ષા વ્યવસ્થા
આ અભિયાન દરમિયાન આતંકવાદી પ્રવૃત્તિઓ, ડ્રગ્સની હેરાફેરી, દાણચોરી અને અન્ય ગેરકાયદેસર પ્રવૃત્તિઓને રોકવા માટે વિવિધ સ્થળોએ ચેકિંગ કરવામાં આવ્યું હતું. મરીન કમાન્ડોની ટીમોએ દરિયાકાંઠાના વિસ્તારોમાં સતત નજર રાખી સંભવિત જોખમોને ઓળખવાનો પ્રયાસ કર્યો હતો.
પેટ્રોલિંગ દરમિયાન શંકાસ્પદ ઇસમો, માછીમારી બોટો તેમજ અવાવરુ અને નિર્જન વિસ્તારોની સઘન તપાસ કરવામાં આવી હતી. સુરક્ષા દળોએ સ્થાનિક વિસ્તારોમાં પણ ચકાસણી કરીને કોઈપણ પ્રકારની શંકાસ્પદ હિલચાલ અંગે માહિતી એકત્રિત કરી હતી.
અધિકારીઓના જણાવ્યા મુજબ, કચ્છનો દરિયાકાંઠો દેશની સુરક્ષાની દૃષ્ટિએ અત્યંત મહત્વપૂર્ણ વિસ્તાર ગણાય છે. તેથી સમયાંતરે સુરક્ષા એજન્સીઓ દ્વારા સંયુક્ત અભિયાનો ચલાવી દરિયાઈ માર્ગોની સુરક્ષા સુનિશ્ચિત કરવામાં આવે છે.
તાજેતરમાં દેશભરમાં સુરક્ષા સંબંધિત સતર્કતા વધારવામાં આવી હોવાથી દરિયાકાંઠાના વિસ્તારોમાં પણ વિશેષ નજર રાખવામાં આવી રહી છે. મરીન કમાન્ડો, કોસ્ટ ગાર્ડ અને અન્ય સુરક્ષા એજન્સીઓ વચ્ચે સંકલન વધારીને કોઈપણ પ્રકારની ગેરકાયદેસર પ્રવૃત્તિને રોકવા પ્રયાસો કરવામાં આવી રહ્યા છે.
સુરક્ષા એજન્સીઓએ સ્થાનિક માછીમારો અને દરિયાકાંઠાના રહેવાસીઓને પણ સતર્ક રહેવા અને કોઈ શંકાસ્પદ વ્યક્તિ, બોટ અથવા પ્રવૃત્તિ અંગે તાત્કાલિક જાણ કરવા અપીલ કરી છે. કચ્છના દરિયાકાંઠે આગામી દિવસોમાં પણ આવા વિશેષ પેટ્રોલિંગ અને સુરક્ષા ચેકિંગ અભિયાન ચાલુ રહેવાની શક્યતા છે.
