રાજકોટ: નાગરિકોને શુદ્ધ અને સુરક્ષિત ખાદ્ય પદાર્થો ઉપલબ્ધ થાય તે હેતુથી રાજકોટ મહાનગરપાલિકાના ફૂડ વિભાગે શહેરવ્યાપી ચેકિંગ અભિયાન શરૂ કર્યું છે. છેલ્લા છ દિવસ દરમિયાન હાથ ધરાયેલી આ વિશેષ ઝુંબેશમાં 400થી વધુ ખાણીપીણીની પેઢીઓની તપાસ કરવામાં આવી હતી, જેમાં અનેક સ્થળોએ સ્વચ્છતા અને ફૂડ સેફ્ટીના નિયમોના ભંગના કિસ્સાઓ સામે આવ્યા છે.
ફૂડ વિભાગની ટીમોએ શહેરના વિવિધ વિસ્તારોમાં આવેલી હોટલ, રેસ્ટોરન્ટ, ફાસ્ટ ફૂડ સેન્ટર અને અન્ય ખાદ્ય વ્યવસાયિક એકમોની મુલાકાત લઈ ખોરાકની ગુણવત્તા, સ્ટોરેજ વ્યવસ્થા અને સ્વચ્છતાની ચકાસણી કરી હતી.
તપાસ દરમિયાન નિયમોનું પાલન ન થતું હોવાનું જણાતા કુલ 2900 કિલો અખાદ્ય ખાદ્ય સામગ્રીનો નાશ કરવામાં આવ્યો હતો. ઉપરાંત નિયમોના ભંગ બદલ સંબંધિત સંચાલકો પાસેથી રૂ. 31,800નો દંડ પણ વસૂલવામાં આવ્યો હતો.
મહાનગરપાલિકાના જણાવ્યા મુજબ, હાઇજીન અને ફૂડ સેફ્ટીના માપદંડો જાળવવામાં નિષ્ફળ રહેલી 131 પેઢીઓને નોટિસ ફટકારવામાં આવી છે. જ્યારે ગંભીર બેદરકારી અને આરોગ્ય માટે જોખમરૂપ પરિસ્થિતિ જોવા મળતાં ચાર એકમોને સીલ કરવાની કાર્યવાહી કરવામાં આવી હતી.
અધિકારીઓએ સ્પષ્ટ કર્યું છે કે ખાદ્ય સુરક્ષા મામલે કોઈપણ પ્રકારની બેદરકારી સહન કરવામાં આવશે નહીં. નાગરિકોના આરોગ્ય સાથે ચેડાં કરનાર સંચાલકો સામે કડક કાનૂની પગલાં લેવામાં આવશે.
ફૂડ વિભાગે વધુમાં જણાવ્યું છે કે આગામી દિવસોમાં શહેરની મિઠાઈની દુકાનો, દૂધ ડેરીઓ અને બેકરીઓમાં વિશેષ તપાસ અભિયાન હાથ ધરાશે. ખાદ્ય પદાર્થોની ગુણવત્તા અને સ્વચ્છતા જળવાઈ રહે તે માટે નિયમિત ચેકિંગ ચાલુ રાખવામાં આવશે.
આ અભિયાનથી ખાણીપીણીના વ્યવસાય સાથે સંકળાયેલા વેપારીઓમાં સાવચેતીનો માહોલ જોવા મળી રહ્યો છે, જ્યારે નાગરિકો તંત્રની આ કાર્યવાહીથી સંતોષ વ્યક્ત કરી રહ્યા છે.
