રાજસ્થાનના જયપુરમાં એક ચોંકાવનારી ઘટના સામે આવી છે, જ્યાં ‘કોકરોચ જનતા પાર્ટી’ (CJP) ના સ્થાપક અભિજીત દીપકે પર જાહેર વિરોધ પ્રદર્શન દરમિયાન એક અજ્ઞાત યુવકે હુમલો કરી દીધો હતો. ભીડની વચ્ચે આવેલા આ યુવકે અભિજીતને એક પછી એક કેટલીય થપ્પડો મારી દીધી હતી, જેનો વીડિયો પણ સોશિયલ મીડિયા પર વાયરલ થયો છે. આ ઘટના બાદ સ્થળ પર ભારે હોબાળો મચી ગયો હતો.
ભીડ વચ્ચેથી આવીને કર્યો હુમલો
મળતી માહિતી મુજબ, કોકરોચ જનતા પાર્ટી દ્વારા NEET પેપર લીક, શિક્ષણ વ્યવસ્થામાં ખામીઓ અને વધતી બેરોજગારી જેવા ગંભીર મુદ્દાઓને લઈને જયપુરના શહીદ સ્મારક ખાતે એક મોટા વિરોધ પ્રદર્શનનું આયોજન કરવામાં આવ્યું હતું. આ પ્રદર્શનમાં મોટી સંખ્યામાં વિદ્યાર્થીઓ, યુવાનો અને વાલીઓ એકઠા થયા હતા.
અભિજીત દીપકે જેવા જ ઘટનાસ્થળે પહોંચ્યા, કે તરત જ ઉત્સાહિત સમર્થકોએ તેમને ખભા પર ઉઠાવી લીધા હતા. આ દરમિયાન ભીડમાંથી ત્રણ યુવકો આગળ આવ્યા, જેમાંથી એકે અચાનક અભિજીત પર તાબડતોડ થપ્પડો વરસાવવાનું શરૂ કરી દીધું હતું.
સમર્થકોનો આક્રોશ અને પોલીસની કાર્યવાહી
આ અણધારી ઘટનાથી ગુસ્સે ભરાયેલા પ્રદર્શનકારીઓ અને અભિજીતના સમર્થકોએ તુરંત જ તે યુવકને પકડી લીધો હતો અને તેની ભારે ધુલાઈ કરી નાખી હતી. સ્થળ પર તૈનાત પોલીસે તાત્કાલિક દખલગીરી કરીને પરિસ્થિતિ પર કાબૂ મેળવ્યો હતો અને થપ્પડ મારનાર આરોપી યુવકને કસ્ટડીમાં લઈ વિધાયકપુરી પોલીસ સ્ટેશને મોકલી આપ્યો હતો.
નોંધનીય છે કે: આ થપ્પડ કાંડ પહેલા પણ પ્રદર્શન સ્થળે કેટલાક યુવકો વચ્ચે ઉગ્ર બોલાચાલી અને ધક્કામુક્કી થઈ હતી, જેમાં પોલીસે એક યુવકની અટકાયત કરીને મામલો શાંત પાડ્યો હતો.
