રાજ્યભરમાં કાળઝાળ ગરમી પડી રહી છે અને લોકો ગરમીથી બચવા માટે જળાશયો અને સ્વિમિંગ પૂલ તરફ નજર દોડાવી રહ્યા છે. ત્યારે માણાવદરના નાગરિકોને પોતાના જ શહેરના એક એવા ભવ્ય વારસાની યાદ આવી રહી છે જે ક્યારેક સમગ્ર કાઠિયાવાડનું ગૌરવ હતું. માણાવદરના આ ઐતિહાસિક સ્વિમિંગ બાથની હાલત અત્યારે અત્યંત બદતર થઈ ગઈ છે. જેને લઈને સ્થાનિક લોકોમાં તંત્ર સામે ભારે રોષ જોવા મળી રહ્યો છે અને તેને તાત્કાલિક રીપેર કરવાની માંગ ઉઠી છે.
200 રજવાડાઓમાં પણ નહોતું એવું આરસપહાણનું સ્થાપત્ય
ઇતિહાસના પાના ઉથલાવીએ તો, કાઠિયાવાડના 200 જેટલા રજવાડાઓમાં કોઈ પણ રાજવી પાસે ન હોય તેવું આધુનિક અને વૈભવી સ્નાનાગાર માણાવદરમાં હતું. ‘કેસર એ હિન્દ’નો ખિતાબ મેળવનાર રાજ્યના બેગમ ફાતિમા સિદીકા બેગમની યાદમાં, તત્કાલીન નવાબ ગુલામ મોહયુદ્દિનખાન બાબીએ વર્ષ 1937 થી 1939 દરમિયાન આ અદભુત ‘સિદીકા સ્વીમીંગ બાથ’નું નિર્માણ કરાવ્યું હતું. વર્ષ 1939માં ઈ.સી. ગિબ્સના હસ્તે આ ભવ્ય સ્નાનાગાર ખુલ્લું મૂકવામાં આવ્યું હતું.
અંડરગ્રાઉન્ડ પિત્તળની પાઇપો અને POPની સજાવટ
આ સ્વિમિંગ બાથની ભવ્યતા એ વાત પરથી સમજી શકાય છે કે તે આખેઆખું આરસ અને સંગેમરમરના પથ્થરોથી બનાવવામાં આવ્યું હતું. તેના મુખ્ય પ્રવેશદ્વારની બંને બાજુ સુંદર પગથિયાં અને વચ્ચે સ્વિમિંગ માટેનો મોટો કુંડ આવેલો છે. આ કુંડમાં પાણી ભરવા માટે તે જમાનામાં અંડરગ્રાઉન્ડ પિત્તળની પાઇપલાઇનો નાખવામાં આવી હતી. એટલું જ નહીં, તેની છત પર પ્લાસ્ટર ઓફ પેરિસ અને આકર્ષક ફૂલવેલીઓની નકશીકામ કરીને તેને અત્યંત મોહક લુક આપવામાં આવ્યો હતો. અહીં સ્નાન કર્યા પછી કપડાં બદલવા માટે અનેક નાના ડ્રેસિંગ રૂમો અને દર્શકો માટે ગેલેરીઓ પણ બનાવવામાં આવી હતી.
