મોરબી-કચ્છ હાઈવે પર માળિયા (મીંયાણા) તાલુકાના હરિપર ગામ નજીક એક અત્યંત ગમખ્વાર અને કાળજું કંપાવી દેનારો અકસ્માત સર્જાયો છે. કચ્છના સુપ્રસિદ્ધ ધાર્મિક સ્થળ માતાના મઢે શીશ ઝુકાવી, હસતા-રમતા પરત ફરી રહેલા દીવના એક જ પરિવારની ખુશીઓ પળવારમાં માતમમાં ફેરવાઈ ગઈ હતી. ચાલુ મુસાફરીએ ઈકો કારનું ટાયર ફાટતાં સર્જાયેલા આ ભયાનક અકસ્માતમાં બે માસૂમ બાળકો સહિત કુલ ચાર લોકોના ઘટનાસ્થળે જ કમકમાટીભર્યા મોત નીપજ્યા છે.
ટાયર ફાટ્યું ને કાળ બનીને સામે આવી ટ્રક
મળતી માહિતી અનુસાર, મૂળ ગીર સોમનાથના અને હાલ દીવ ખાતે સ્થાયી થયેલો કાપડિયા પરિવાર પોતાની ઈકો ગાડી લઈને કચ્છમાં મા આશાપુરાના દર્શને ગયો હતો. માતાજીના આશીર્વાદ લઈને આખો પરિવાર ભારે ઉત્સાહ સાથે દીવ તરફ પરત ફરી રહ્યો હતો. આ દરમિયાન માળિયા તાલુકાના હરિપર ગામના પાટિયા પાસેથી પસાર થતી વખતે અચાનક જ ઈકો કારનું ટાયર ધડાકાભેર ફાટ્યું હતું.
ટાયર ફાટવાના કારણે કાર ચાલકે સ્ટેરીંગ પરનો કાબૂ ગુમાવી દીધો હતો. બેકાબૂ બનેલી ઈકો કાર પૂરપાટ ઝડપે ડિવાઇડર કૂદીને સામેની લેનમાં ધસી ગઈ હતી અને સામેથી આવી રહેલી એક ભારેભરખમ ટ્રક સાથે ધડાકાભેર અથડાઈ હતી. આ ટક્કર એટલી પ્રચંડ હતી કે ઈકો ગાડીનો કચ્ચરઘાણ વળી ગયો હતો અને ગાડીના પતરા ચીરાઈ ગયા હતા.
ઘટનાસ્થળે જ કંપારી છૂટી જાય તેવા દ્રશ્યો: મૃતકોની યાદી
આ ગોઝારી દુર્ઘટનામાં ઈકો ગાડીમાં સવાર કુલ 6 વ્યક્તિઓમાંથી 4 લોકોના ઘટનાસ્થળે જ કમકમાટીભર્યા મોત નીપજ્યા હતા. અકસ્માત એટલો ભયાવહ હતો કે ચીસાચીસ વચ્ચે ચાર લોકોએ ત્યાં જ દમ તોડી દીધો હતો.
મૃતકોના નામ:
-
ભરતકુમાર વીરજીભાઈ બાંભણિયા (ઉં.વ. 40) – (કાર ચાલક)
-
કંચનબેન વિરજીભાઈ બાંભણિયા (ઉં.વ. 60)
-
મનોજ લક્ષ્મણભાઈ કાપડિયા (ઉં.વ. 50)
-
જીવાંશુ મનોજ કાપડિયા (ઉં.વ. 7)
