ઓટોગ્રાફ માંગતા બાળક પર ભડક્યો રિયાન પરાગ? વીડિયો વાયરલ થતાં જ ફેન્સે લીધો આડેહાથ!

IPL 2026 માં રાજસ્થાન રોયલ્સના કેપ્ટન રિયાન પરાગનો એક વીડિયો સોશિયલ મીડિયા પર ખૂબ વાયરલ થઈ રહ્યો છે. આ વીડિયોમાં એક નાનો ફેન તેમની પાસે ઓટોગ્રાફ માંગતો જોવા મળે છે, પરંતુ પરાગ કથિત રીતે તેને ખીજાતા અને દૂર હટાવતા નજરે પડે છે. આ ઘટના બાદ ક્રિકેટ ફેન્સે આ યુવા ખેલાડીના વર્તન (એટિટ્યુડ) પર ગંભીર સવાલો ઉઠાવ્યા છે.

‘હટ…’ વીડિયોમાં સંભળાયો અવાજ

વીડિયોમાં જોઈ શકાય છે કે સુરક્ષાકર્મીઓથી ઘેરાયેલા રિયાન પરાગની નજીક એક બાળક પહોંચે છે અને કહે છે, “રિયાન સર, પ્લીઝ સર.” જોકે, બાળક જ્યારે સતત ઓટોગ્રાફ માટે વિનંતી કરતો રહ્યો, ત્યારે પરાગ તેને હટી જવા માટે કહેતા દેખાયા. વીડિયોમાં ‘હટ’ શબ્દ પણ સંભળાઈ રહ્યો છે. આસપાસ હાજર અન્ય લોકો પણ ઓટોગ્રાફ આપવા અપીલ કરી રહ્યા હતા, પરંતુ આ બેટ્સમેન કોઈ પણ પ્રતિક્રિયા આપ્યા વગર આગળ વધી ગયો.

સોશિયલ મીડિયા પર ફેન્સનો ગુસ્સો ફાટી નીકળ્યો

વીડિયો વાયરલ થયા બાદ સોશિયલ મીડિયા પર ફેન્સે રિયાન પરાગની આકરી ટીકા કરી છે.

ઘણા યુઝર્સે કહ્યું કે, ખેલાડીઓ માત્ર મેદાન પર જ નહીં, પણ મેદાનની બહાર પણ રોલ મોડેલ ગણાય છે.

એક યુઝરે લખ્યું: “ફેન્સ માટે બિલકુલ સન્માન નથી, આવા ખેલાડીઓ કોઈના આદર્શ કેવી રીતે બનશે?”

બીજા એક યુઝરે લખ્યું: “મેદાન પર આ જ આક્રમકતા બતાવી હોત તો સારું થાત.”

ફેન્સે રોહિત શર્મા અને એમએસ ધોની જેવા દિગ્ગજ ખેલાડીઓના ઉદાહરણ આપતા કહ્યું કે, મોટા ખેલાડીઓ હંમેશા પોતાના ફેન્સ માટે સમય કાઢે છે અને તેમને સન્માન આપે છે.

પરાગ પહેલા પણ વિવાદોમાં રહી ચૂક્યો છે

રિયાન પરાગ વિવાદોમાં આવ્યો હોય તેવો આ પહેલો કિસ્સો નથી. આ પહેલા પંજાબ કિંગ્સ સામેની મેચ દરમિયાન ડ્રેસિંગ રૂમમાં વેપિંગ (Vaping) કરતો તેનો એક વીડિયો વાયરલ થયો હતો. તે મામલામાં BCCIએ તેના પર દંડ લગાવ્યો હતો અને એક ડિમેરિટ પોઈન્ટ પણ આપ્યો હતો.

દિલ્હી સામેની હાર બાદ મેદાન પર પણ ગુસ્સો દેખાયો હતો

દિલ્હી કેપિટલ્સ સામેની મેચમાં રાજસ્થાન રોયલ્સને 5 વિકેટે હારનો સામનો કરવો પડ્યો હતો. 194 રનના ટાર્ગેટનો પીછો કરતા દિલ્હીએ કેએલ રાહુલના 56 અને અભિષેક પોરેલના 51 રનની મદદથી સરળ જીત મેળવી હતી. મેચ દરમિયાન રાજસ્થાનની નબળી ફિલ્ડિંગથી રિયાન પરાગ ભારે નારાજ દેખાયો હતો.

મેચ બાદ પરાગે કહ્યું હતું: “અમે મેદાન પર જે પ્રદર્શન કર્યું, તે અમારા સ્તરનું નહોતું. જો અમે આવું જ રમતા રહીશું તો પ્લેઓફને લાયક નથી. જો અમે ક્વોલિફાય નહીં કરીએ, તો તેના જવાબદાર અમે પોતે જ હોઈશું, બીજું કોઈ નહીં.”