મિડિલ ઈસ્ટમાં ભભૂકી રહેલી યુદ્ધની જ્વાળાઓ વચ્ચે ઈરાને તેના નવા સર્વોચ્ચ નેતાની જાહેરાત કરી દીધી છે. ઈરાનની શક્તિશાળી સંસ્થા ‘એસેમ્બલી ઓફ એક્સપર્ટ્સ’ (નિષ્ણાતોની સભા) એ અયાતુલ્લા અલી ખામેનેઈના પુત્ર મોજતબા ખામેનેઈને દેશના નવા સુપ્રીમ લીડર તરીકે ચૂંટી કાઢ્યા છે.
અમેરિકા-ઈઝરાયેલના હુમલામાં અલી ખામેનેઈનું નિધન
આ ઐતિહાસિક ફેરફાર પાછળનું કારણ 28 ફેબ્રુઆરીનો એ ભીષણ હુમલો છે, જેણે સમગ્ર ઈરાનને હચમચાવી દીધું હતું. અમેરિકા અને ઈઝરાયેલના સંયુક્ત હવાઈ હુમલામાં ઈરાનના અત્યાર સુધીના સૌથી શક્તિશાળી નેતા અયાતુલ્લા અલી ખામેનેઈનું નિધન થયું હતું. ત્યારથી ઈરાનમાં સત્તાના સર્વોચ્ચ પદ માટે મનોમંથન ચાલી રહ્યું હતું, જેનો અંત હવે મોજતબાની નિમણૂક સાથે આવ્યો છે.
કોણ છે મોજતબા ખામેનેઈ?
મોજતબા ખામેનેઈ લાંબા સમયથી ઈરાનની સત્તાવાર વ્યવસ્થામાં પડદા પાછળ રહીને કામ કરી રહ્યા હતા.
-
વગદાર વ્યક્તિત્વ: તેઓ ઈરાનની ગુપ્તચર સંસ્થાઓ અને રિપોબ્લિકન ગાર્ડ્સ પર મજબૂત પકડ ધરાવે છે તેમ માનવામાં આવે છે.
-
કડક વલણ: પિતાની જેમ જ તેઓ પણ પશ્ચિમી દેશો પ્રત્યે કડક વલણ ધરાવતા નેતા તરીકે ઓળખાય છે. તેમની નિમણૂક સૂચવે છે કે ઈરાન યુદ્ધના મેદાનમાં પીછેહઠ કરવાના મૂડમાં નથી.
28 ફેબ્રુઆરીની એ ‘કાળી રાત’ અને પલટવાર
28 ફેબ્રુઆરીએ જ્યારે ઈઝરાયેલ અને અમેરિકાએ ઈરાનના વ્યૂહાત્મક સ્થળો પર હુમલો કર્યો, ત્યારે માત્ર ઈરાન જ નહીં પણ આખું મિડિલ ઈસ્ટ યુદ્ધના મેદાનમાં ફેરવાઈ ગયું હતું.
-
ઈરાનનો વળતો પ્રહાર: સર્વોચ્ચ નેતાના મોત બાદ ઈરાને ભારે આક્રોશ સાથે વળતી કાર્યવાહી શરૂ કરી હતી.
-
7 દેશો પર હુમલા: ઈરાને ખાડીના લગભગ 7 દેશોમાં આવેલા અમેરિકી સૈન્ય બેઝને નિશાન બનાવીને સેંકડો મિસાઈલો છોડી હતી. આ હુમલાઓએ સમગ્ર વિશ્વને ત્રીજા વિશ્વયુદ્ધના ઉંબરે લાવીને ઊભું કરી દીધું છે.
