કોડીનારના વલાદરમાં સિંહનો આતંક: ઘરની બહાર સૂતેલા ૩૦ વર્ષના શ્રમિક યુવકને ૩૦૦ મીટર ઢસડીને ફાડી ખાધો

કોડીનારના વલાદરમાં સિંહણે 30 વર્ષના યુવાનને 300 મીટર ઢસડીને શિકાર કર્યો, લોકોમાં આક્રોશ

ગીર-સોમનાથ જિલ્લાના કોડીનાર તાલુકાના વલાદર ગામે બનેલી અત્યંત હૃદયદ્રાવક ઘટનાએ સમગ્ર પંથકમાં ભારે ભય અને આક્રોશ ફેલાવ્યો છે. ઘરની બહાર સૂતેલા ૩૦ વર્ષીય શ્રમિક યુવક મહેશભાઈ પ્રતાપભાઈ રાઠોડ પર સિંહણે હુમલો કરી તેને ૩૦૦ મીટર દૂર ખેતરમાં ઢસડી જઈને શિકાર બનાવ્યો હતો. આ દુર્ઘટનાના પગલે પરિવારના ૫ નાના બાળકોએ પિતાની છત્રછાયા ગુમાવી છે.

ઘટના અને રોષની મુખ્ય વિગતો:

• ઘટનાની વિગત: મૃતક મહેશભાઈ મજૂરી કામ માટે પોરબંદર રહેતા હતા અને દાદાનું અવસાન થતાં વતન આવ્યા હતા. રાત્રે ઘરની બહાર સૂતેલા તેમની પર સિંહણે હુમલો કર્યો હતો. વહેલી સવારે પરિવારજનોએ શોધખોળ કરતાં આ ભયાનક ઘટના સામે આવી હતી.

• ગ્રામજનોનો આક્રોશ અને વળતરની માંગ: અગાઉ પણ વન્યપ્રાણીઓની અવરજવર અંગે રજૂઆતો કરવા છતાં પૂરતી લાઈટ કે પ્રોટેક્શનની વ્યવસ્થા ન કરાતા ગ્રામજનોમાં ભારે રોષ ફેલાયો હતો. આક્રોશિત પરિવારે રૂ. ૪૦ લાખનું વળતર આપવા અને માનવભક્ષી સિંહણને તાત્કાલિક પાંજરે પૂરવાની માંગ સાથે મૃતદેહ સ્વીકારવાનો ઇનકાર કર્યો હતો.

• તંત્ર દ્વારા કાર્યવાહી: વન વિભાગના ઉચ્ચ અધિકારીઓની સમજાવટ અને હુમલાખોર સિંહણને પકડવા માટે ચાર અલગ-અલગ સ્થળોએ પાંજરા ગોઠવવાની તજવીજ હાથ ધર્યા બાદ અંતે પરિવારે મૃતદેહ સ્વીકાર્યો હતો.