I.N.D.I.A. ગઠબંધનની મહા રેલી સામે પોલીસની કાર્યવાહી: 4 FIR, 500 સોશિયલ મીડિયા પોસ્ટ હટાવવા નોટિસ
દિલ્હીમાં વિપક્ષી ગઠબંધન ‘INDIA’ દ્વારા મુખ્ય ચૂંટણી કમિશનરના રાજીનામા અને SIR પ્રક્રિયા વિરુદ્ધ યોજવામાં આવેલી માર્ચ અને વિરોધ પ્રદર્શનને લઈને દિલ્હી પોલીસે કડક રૂખ અપનાવ્યો છે. પ્રતિબંધાત્મક આદેશોનો ભંગ કરવા, બેરિકેડ્સ તોડવા અને જાહેર માર્ગોને નુકસાન પહોંચાડવા બદલ પોલીસે કુલ ૪ એફઆઈઆર (FIR) નોંધી છે. તિલક માર્ગ પોલીસ સ્ટેશનમાં બે જ્યારે મંદિર માર્ગ અને બારાખંબા રોડ પોલીસ સ્ટેશનમાં એક-એક ગુનો દાખલ કરવામાં આવ્યો છે. આ પ્રદર્શન દરમિયાન ૧૦,૦00થી વધુ સુરક્ષાકર્મીઓ તૈનાત રહ્યા હતા.
કાર્યવાહી અને અફવાઓ અંગેની મુખ્ય વિગતો:
-
પાકિસ્તાની એકાઉન્ટ્સ અને ભ્રામક પ્રચાર પર નજર: પ્રદર્શનની આડમાં દેશવિરોધી પ્રચાર અને કોમી સૌહાર્દ બગાડવાના પ્રયાસો સામે પોલીસે અલગથી ૪ એફઆઈઆર નોંધી છે. તપાસમાં બહાર આવ્યું છે કે પાકિસ્તાન સ્થિત શંકાસ્પદ હેન્ડલ્સ અને ફેક આઈડી દ્વારા જૂના તેમજ એડિટ કરેલા હિંસાના વીડિયો વાયરલ કરી દિલ્હીમાં રમખાણો કે સેના તૈનાત થયા હોવાની અફવાઓ ફેલાવાઈ રહી હતી.
-
૫૦૦ સોશિયલ મીડિયા પોસ્ટ હટાવવા આદેશ: સોશિયલ મીડિયા પર ગેરમાર્ગે દોરનારી આશરે ૫૦૦ વાંધાજનક પોસ્ટ્સને તાત્કાલિક હટાવવા માટે પોલીસે વિવિધ પ્લેટફોર્મ્સને પત્ર પાઠવ્યો છે. હાલ ૧૦૦થી વધુ શંકાસ્પદ હેન્ડલ્સ પોલીસની સ્કેનર હેઠળ છે.
-
વિપક્ષી નેતાઓની માર્ચ: લોકસભામાં વિપક્ષના નેતા રાહુલ ગાંધીની આગેવાનીમાં હજારો કાર્યકરોએ બારાખંબા રોડથી સુપ્રીમ કોર્ટ સુધી માર્ચ કરી નારેબાજી કરી હતી. આ દરમિયાન પ્રતિબંધાત્મક આદેશો (BNSS કલમ ૧૬૩) લાગુ હોવાથી પોલીસે ભીડને નિયંત્રિત કરવા જરૂરી કાર્યવાહી કરી હતી.
