રાજકોટ, 14 ઓગસ્ટ 2026: સ્વતંત્રતા પર્વની ઉજવણીના ભાગરૂપે રાજકોટ મહાનગરપાલિકા દ્વારા 13 ઓગસ્ટે ભવ્ય *“તિરંગા યાત્રા”*નું આયોજન કરવામાં આવ્યું હતું. યાત્રામાં વિવિધ સંસ્થાઓ, શાળા-કોલેજના વિદ્યાર્થીઓ અને મોટી સંખ્યામાં શહેરીજનો જોડાતા શહેરના રસ્તાઓ પર દેશભક્તિનો માહોલ છવાઈ ગયો હતો.
મેયર ડૉ. નેહલ શુક્લ સહિતના મહાનુભાવોએ તિરંગા યાત્રાને ફ્લેગ ઓફ કરાવી હતી. યાત્રા ચૌધરી હાઈસ્કૂલ રોડ થઈ જ્યુબિલી ગાર્ડન ખાતે પૂજ્ય મહાત્મા ગાંધીજીની પ્રતિમા સુધી પહોંચી હતી.
યાત્રામાં ધારાસભ્યો, ભાજપના આગેવાનો, રાજકોટ મહાનગરપાલિકાના પદાધિકારીઓ, પોલીસ અને વહીવટી તંત્રના અધિકારીઓ ઉપરાંત વિવિધ સામાજિક અને ધાર્મિક સંસ્થાઓ, વેપારી સંગઠનો, ઔદ્યોગિક એસોસિએશનો, NGO, NSS-NCC, શાળાઓ તથા યુનિવર્સિટીના વિદ્યાર્થીઓ જોડાયા હતા.
યાત્રાના રૂટ પર તિરંગા વિતરણ માટે કાઉન્ટર, પાણી અને મેડિકલ ટીમ, સાંસ્કૃતિક કાર્યક્રમો માટે સ્ટેજ તેમજ પોલીસ બેન્ડ અને ફાયર બ્રિગેડની વ્યવસ્થા કરવામાં આવી હતી. વિવિધ સંસ્થાઓ દ્વારા રાસ-ગરબા અને આદિવાસી નૃત્ય સહિતની કૃતિઓ પણ રજૂ કરવામાં આવી હતી.
મેયર ડૉ. નેહલ શુક્લએ જણાવ્યું હતું કે દેશની નવી પેઢીમાં રાષ્ટ્રભાવના અને ઐતિહાસિક વારસા પ્રત્યે ગૌરવની ભાવના મજબૂત કરવા આવા કાર્યક્રમો મહત્વપૂર્ણ છે. તેમણે *“વિકસિત ભારત”*ના સંકલ્પને સાકાર કરવા નાગરિકોની સહભાગિતાને જરૂરી ગણાવી હતી.
સ્વચ્છતાનો સંદેશ આપતા મેયરે જાહેરમાં કચરો નહીં ફેંકવાનો સંકલ્પ કરવા પણ અપીલ કરી હતી. અંતે જ્યુબિલી ગાર્ડનમાં મહાત્મા ગાંધીજીની પ્રતિમાને પુષ્પાંજલિ અર્પણ કરી તિરંગા યાત્રાનું સમાપન કરવામાં આવ્યું હતું.
