ગોંડલ: રાજકોટ ગ્રામ્ય એન્ટી હ્યુમન ટ્રાફિકિંગ યુનિટ (AHTU)એ ગોંડલ બસ સ્ટેન્ડ સામે આવેલા અમૃત ગેસ્ટ હાઉસમાં દરોડો પાડી કથિત દેહવ્યાપારના ગેરકાયદેસર ધંધાનો પર્દાફાશ કર્યો છે. કાર્યવાહીના અંતે ગેસ્ટ હાઉસના સંચાલન સાથે સંકળાયેલા ત્રણ વ્યક્તિઓ સામે અનૈતિક માનવ વેપાર (નિવારણ) અધિનિયમ હેઠળ ગુનો નોંધવામાં આવ્યો છે.
પોલીસને મળેલી ચોક્કસ બાતમીના આધારે મહિલા પોલીસ સહિતની ટીમે સંયુક્ત દરોડો પાડ્યો હતો. તપાસ દરમિયાન ગેસ્ટ હાઉસમાંથી કેટલીક મહિલાઓને મુક્ત કરાવવામાં આવી હોવાનું અને સ્થળ પરથી મળેલા પ્રાથમિક પુરાવાના આધારે કાયદેસરની કાર્યવાહી હાથ ધરવામાં આવી હોવાનું પોલીસે જણાવ્યું છે.
પ્રાથમિક તપાસમાં ગેસ્ટ હાઉસમાં આવનારા લોકોની ઓળખ અને નોંધણી પ્રક્રિયામાં પણ બેદરકારી સામે આવી હોવાની માહિતી મળી છે. પોલીસે CCTV ફૂટેજ, દસ્તાવેજો અને અન્ય પુરાવાના આધારે સમગ્ર મામલે વધુ તપાસ શરૂ કરી છે.
શહેરના વ્યસ્ત બસ સ્ટેન્ડ સામે આવેલી ગેસ્ટ હાઉસમાં આવી પ્રવૃત્તિ સામે આવતા સ્થાનિક સ્તરે પણ અનેક પ્રશ્નો ઊભા થયા છે. જોકે, આ મામલે વધુ વિગતો પોલીસ તપાસ પૂર્ણ થયા બાદ જ સ્પષ્ટ થશે.
પોલીસ હવે માત્ર નોંધાયેલા આરોપીઓ પૂરતા નહીં પરંતુ સમગ્ર નેટવર્ક, સંભવિત સંડોવાયેલા લોકો અને અન્ય કડીઓ સુધી પહોંચવા માટે તપાસ આગળ ધપાવી રહી છે.
