અમદાવાદમાં રિક્ષા ચાલકોની હડતાળને કારણે મુસાફરોને અવરજવરમાં મુશ્કેલી ન પડે તે માટે AMTS દ્વારા વધારાની બસો અને સ્ટાફની વ્યવસ્થા કરવામાં આવી છે. શહેરના મહત્વના રેલવે સ્ટેશન અને ટ્રાન્ઝિટ પોઇન્ટ્સ પર મુસાફરોની વધતી ભીડને ધ્યાનમાં રાખીને અલગ-અલગ રૂટ પર બસોની સંખ્યા વધારવામાં આવી છે.
મુખ્ય વ્યવસ્થા
- રાણીપથી કાલુપુર સહિતના રૂટ પર આશરે 90 બસો ઉપલબ્ધ રહેશે.
- રાણીપ બસ સ્ટેશન ખાતે 2 કન્ટ્રોલર અને 2 વધારાની બસો મૂકવામાં આવી.
- સાબરમતી રેલવે સ્ટેશનથી કાલુપુર અને મણિનગર તરફ 2 વધારાની બસો દોડશે.
- વટવા રેલવે સ્ટેશન પર પણ 2 વધારાની બસોની વ્યવસ્થા કરાઈ.
- કાલુપુર ખાતે 4 વધારાની બસો અને 2 ફ્લાઈંગ ટીમો તૈનાત કરવામાં આવી.
રાણીપથી પસાર થતા વિવિધ રૂટની બસો દ્વારા કાલુપુર, મણિનગર, લાલદરવાજા, વાસણા અને પાલડી જેવા વિસ્તારોને જોડવામાં આવશે. રિક્ષા સેવા બંધ રહેતા આ વિસ્તારોમાં મુસાફરોની સંખ્યા વધવાની શક્યતા હોવાથી AMTS દ્વારા બસોની ઉપલબ્ધતા જાળવવા ખાસ આયોજન કરાયું છે.
સાબરમતી અને વટવા રેલવે સ્ટેશન પર પણ મુસાફરોની જરૂરિયાત પ્રમાણે બસો ઉપલબ્ધ રાખવામાં આવી છે. વટવાથી કેટલીક બસોને ગીતામંદિર થઈને કાલુપુર, મણિનગર અને લાલદરવાજા તરફ દોડાવવાની વ્યવસ્થા કરાઈ છે.
ગીતામંદિર અને કાલુપુર પર ખાસ નજર
શહેરના મોટા ટ્રાન્ઝિટ હબ એવા ગીતામંદિર અને કાલુપુર ખાતે મુસાફરોની ભીડને સંભાળવા માટે કન્ટ્રોલર અને ફ્લાઈંગ ટીમોને તૈનાત કરવામાં આવી છે. ગીતામંદિરથી વિવિધ રૂટની બસો આશરે 15થી 20 મિનિટના અંતરે ચલાવવાનો પ્રયાસ કરવામાં આવશે.
રિક્ષા હડતાળ દરમિયાન મુસાફરોને લાંબો સમય રાહ જોવી ન પડે અને રેલવે સ્ટેશન, નોકરી-ધંધાના સ્થળો તથા શહેરના વિવિધ વિસ્તારોમાં પહોંચવામાં મુશ્કેલી ઓછી થાય તે માટે AMTS દ્વારા આ વધારાની વ્યવસ્થા કરવામાં આવી છે. મુસાફરોની ભીડ પ્રમાણે જરૂરિયાત મુજબ બસોની સંખ્યા અને રૂટમાં ફેરફાર કરવાની પણ તૈયારી રાખવામાં આવી છે
