વડાપ્રધાન નરેન્દ્ર મોદી આજે એક દિવસીય ગુજરાત પ્રવાસે આવી રહ્યા છે. તેમના પ્રવાસને લઈને વડોદરા અને નવસારીમાં વહીવટી તંત્રથી લઈને સ્થાનિક લોકોમાં ઉત્સાહનો માહોલ જોવા મળી રહ્યો છે. વડોદરામાં તો PM મોદીના સ્વાગત માટે લોકો ગરબે પણ ઘૂમ્યા હતા. યુવા વર્ગ અને ખાસ કરીને Gen-Zમાં પણ વડાપ્રધાનના કાર્યક્રમને લઈને ખાસ ઉત્સાહ જોવા મળી રહ્યો છે.
વડોદરામાં કાર્યક્રમની મુખ્ય બાબતો
- રૂ. 35,200 કરોડથી વધુના વિકાસકાર્યોનું લોકાર્પણ અને ખાતમુહૂર્ત
- રેલવે, હાઇવે, બ્રિજ, પાણી અને શહેરી વિકાસ સહિતના પ્રોજેક્ટ્સ
- રૂ. 30,766 કરોડથી વધુના રેલવે પ્રોજેક્ટ્સનો સમાવેશ
- વેસ્ટર્ન ડેડિકેટેડ ફ્રેઇટ કોરિડોરના ત્રણ વિભાગોનું લોકાર્પણ
- યુવાનો માટે કાર્યક્રમનું લાઇવ બ્રોડકાસ્ટિંગ પણ યોજાશે
વડોદરાના યુનિવર્સિટી ગ્રાઉન્ડ ખાતે યોજાનારા કાર્યક્રમમાં વડાપ્રધાન વિવિધ વિકાસ યોજનાઓને ગુજરાતને સમર્પિત કરશે. કેન્દ્ર અને રાજ્ય સરકારના મળીને રૂ. 35,200 કરોડથી વધુના પ્રોજેક્ટ્સનો આ કાર્યક્રમમાં સમાવેશ થાય છે. તેમાં રેલવે ક્ષેત્રના મોટા પ્રોજેક્ટ્સ ઉપરાંત હાઇવે, બ્રિજ, પાણી પુરવઠો, ઊર્જા અને શહેરી વિકાસ સાથે જોડાયેલા કામોનો પણ સમાવેશ થાય છે.
નવસારીમાં 1,191 લાભાર્થીઓને સહાયક સાધનોનું વિતરણ
વડોદરા બાદ PM મોદી નવસારી પહોંચશે, જ્યાં વરિષ્ઠ નાગરિકો અને દિવ્યાંગ લાભાર્થીઓ માટે વિશેષ કાર્યક્રમ યોજાશે. જરૂરિયાતમંદ લાભાર્થીઓને તેમની જરૂરિયાત મુજબના સહાયક સાધનોનું વિતરણ કરવામાં આવશે.
નવસારી કાર્યક્રમની વિગતો
- 917 વયોશ્રી લાભાર્થીઓને સહાયક સાધનો
- 274 દિવ્યાંગ લાભાર્થીઓને સાધનોનું વિતરણ
- કુલ 1,191 લાભાર્થીઓને લાભ મળશે
- સાધનોની કુલ કિંમત આશરે રૂ. 93.39 લાખ
- પરંપરાગત વેશભૂષામાં 1,100 બહેનો દ્વારા સ્વાગતની તૈયારી
- આશરે 500 પુરુષો ડમરુ સાથે અભિવાદન કરશે
નવસારીમાં વડાપ્રધાન નવનિર્મિત ‘નમો કમલમ’ કાર્યાલયનું પણ લોકાર્પણ કરશે. કાર્યાલયમાં મુખ્ય કચેરી, મીડિયા વિભાગ, કોલ સેન્ટર, લાઇબ્રેરી અને બેઠક હોલ સહિતની વિવિધ સુવિધાઓ ઊભી કરવામાં આવી છે. કાર્યક્રમ દરમિયાન વડાપ્રધાન કાર્યાલયના વિવિધ વિભાગોની મુલાકાત પણ લેશે.
બંને શહેરોમાં સુરક્ષા વ્યવસ્થા કડક
PM મોદીના પ્રવાસને ધ્યાનમાં રાખીને વડોદરા અને નવસારીમાં સુરક્ષા વ્યવસ્થા મજબૂત કરવામાં આવી છે. નવસારીમાં પોલીસ, હોમગાર્ડ અને ટ્રાફિક બ્રિગેડ સહિત આશરે 2,000 જવાનોને સુરક્ષા વ્યવસ્થામાં તૈનાત કરવામાં આવનાર છે.
આ સમગ્ર પ્રવાસ દરમિયાન વિકાસકાર્યોના લોકાર્પણ સાથે બંને શહેરોમાં વડાપ્રધાનના ભવ્ય સ્વાગતની તૈયારીઓ પણ જોવા મળી રહી છે. વડોદરામાં ગરબા અને યુવાનોનો ઉત્સાહ હોય કે નવસારીમાં પરંપરાગત રીતે સ્વાગતની તૈયારીઓ, PM મોદીના આગમન પહેલાં જ બંને શહેરોમાં ઉત્સવ જેવો માહોલ જોવા મળી રહ્યો છે.
