ગાંધીનગર: ગુજરાતમાં ચાલુ ચોમાસાની મોસમ દરમિયાન વરસાદની ગતિ ધીમી રહી હોવા છતાં રાજ્યના જળાશયોમાં પાણીની સ્થિતિમાં નોંધપાત્ર સુધારો જોવા મળી રહ્યો છે. અત્યાર સુધી રાજ્યમાં સિઝનનો સરેરાશ 25.10 ટકા વરસાદ નોંધાયો છે, જ્યારે રાજ્યની જીવાદોરી ગણાતા સરદાર સરોવર નર્મદા ડેમમાં 65.61 ટકા જળસંગ્રહ થતાં પાણીની ઉપલબ્ધિ અંગે રાહતજનક સ્થિતિ સર્જાઈ છે.
વરસાદના ઝોનવાર આંકડાઓ મુજબ દક્ષિણ ગુજરાતમાં સૌથી વધુ 35.29 ટકા વરસાદ નોંધાયો છે. ત્યારબાદ સૌરાષ્ટ્રમાં 27.98 ટકા, મધ્ય-પૂર્વ ગુજરાતમાં 17.83 ટકા અને ઉત્તર ગુજરાતમાં 14.39 ટકા વરસાદ નોંધાયો છે. બીજી તરફ કચ્છમાં માત્ર 2.14 ટકા વરસાદ નોંધાતા હજુ પણ પૂરતા વરસાદની રાહ જોવાઈ રહી છે.
રાજ્યના જળાશયોની સ્થિતિ પણ સતત સુધરી રહી છે. હાલમાં 5 જળાશયો સંપૂર્ણ ભરાઈ ગયા છે, જ્યારે 20 જળાશયો 70થી 100 ટકા ક્ષમતા સુધી પહોંચ્યા છે. ઉપરાંત 24 જળાશયોમાં 50થી 70 ટકા, 51 જળાશયોમાં 25થી 50 ટકા અને 106 જળાશયોમાં 25 ટકા સુધી જળસંગ્રહ નોંધાયો છે.
સરદાર સરોવર ડેમમાં સતત વધતા જળસંગ્રહને કારણે રાજ્યમાં પીવાના પાણી, સિંચાઈ અને ઔદ્યોગિક ઉપયોગ માટે પૂરતા પાણીની આશા મજબૂત બની છે. જોકે, કચ્છ સહિત કેટલાક વિસ્તારોમાં વરસાદની અછત યથાવત હોવાથી આગામી દિવસોમાં ચોમાસાની ગતિવિધિ મહત્વપૂર્ણ રહેશે.
હવામાન વિભાગના અનુમાન મુજબ આગામી દિવસોમાં રાજ્યના કેટલાક વિસ્તારોમાં વરસાદી પ્રવૃત્તિમાં વધારો થઈ શકે છે, જેના કારણે જળાશયોમાં પાણીની આવક વધુ વધવાની શક્યતા વ્યક્ત કરવામાં આવી રહી છે.
