અમદાવાદ: અમદાવાદ આંતરરાષ્ટ્રીય એરપોર્ટ પર કસ્ટમ્સ વિભાગે ગેરકાયદે સોનાની હેરાફેરી સામે વધુ એક સફળ કાર્યવાહી કરી છે. અબુધાબીથી આવેલી એક મહિલા મુસાફર પાસેથી 233 ગ્રામ 24 કેરેટનું સોનું જપ્ત કરવામાં આવ્યું છે, જેની અંદાજિત કિંમત રૂ.34.29 લાખ થાય છે.
માહિતી અનુસાર, મહિલા મુસાફર અબુધાબીથી ફ્લાઇટ નંબર 3K111 દ્વારા અમદાવાદ પહોંચી હતી. એર ઇન્ટેલિજન્સ યુનિટ (AIU)ના અધિકારીઓએ શંકાના આધારે તેની તપાસ કરતાં મહિલાના બુરખાની અંદરથી બે ગોલ્ડ ટીટી બાર મળી આવ્યા હતા. કસ્ટમ્સ ડ્યૂટીથી બચવાના હેતુથી સોનું શરીર પર છુપાવી લાવવામાં આવ્યું હોવાનું તપાસમાં સામે આવ્યું છે.
કસ્ટમ્સ વિભાગે સમગ્ર સોનાનો જથ્થો કસ્ટમ્સ એક્ટ, 1962 હેઠળ જપ્ત કરીને આગળની કાર્યવાહી શરૂ કરી છે. અધિકારીઓ હવે એ તપાસ કરી રહ્યા છે કે આ સોનું કયા દેશમાંથી કોના માધ્યમથી લાવવામાં આવ્યું હતું અને ભારતમાં તેનો અંતિમ લાભાર્થી કોણ હતો.
અધિકારીઓના જણાવ્યા મુજબ મુસાફરોની રિસ્ક પ્રોફાઇલિંગ સિસ્ટમના આધારે સતત મોનિટરિંગ કરવામાં આવે છે. મુસાફરીનો ઇતિહાસ, વિદેશ પ્રવાસની આવર્તન અને અન્ય ગુપ્ત માહિતીના આધારે શંકાસ્પદ મુસાફરોની ઓળખ કરીને તપાસ હાથ ધરવામાં આવે છે.
કસ્ટમ્સનું માનવું છે કે એરપોર્ટ પર આવી સતત કાર્યવાહીના કારણે ગોલ્ડ સ્મગલિંગના આંતરરાષ્ટ્રીય નેટવર્ક સામે અસરકારક કાર્યવાહી કરવામાં મદદ મળી રહી છે અને આગામી સમયમાં પણ આવી તપાસ વધુ સઘન બનાવવામાં આવશે.
