રાજકોટ: રાજકોટ ગ્રામ્ય પોલીસને ગેરકાયદે દારૂની હેરાફેરી સામે વધુ એક મોટી સફળતા મળી છે. ગ્રામ્ય એલસીબીની ટીમે વિંછિયા પોલીસ સ્ટેશન હદમાં આવેલા હિંગોળગઢ નજીક વીડી વિસ્તારમાંથી રૂ.25.60 લાખથી વધુ કિંમતનો વિદેશી દારૂનો જથ્થો કબજે કર્યો છે. કાર્યવાહી દરમિયાન કોઈ આરોપી હાથ લાગ્યો ન હતો, પરંતુ સમગ્ર જથ્થો પોલીસના કબજામાં લઈ તપાસનો ધમધમાટ શરૂ કરવામાં આવ્યો છે.
પોલીસને મળેલી ગુપ્ત બાતમીના આધારે એલસીબીની ટીમે હિંગોળગઢથી ગુંદાળા જતાં માર્ગ પર આવેલા વીડી વિસ્તારમાં સર્ચ ઓપરેશન હાથ ધર્યું હતું. તપાસ દરમિયાન ખુલ્લા વિસ્તારમાં પડેલો દારૂનો મોટો જથ્થો મળી આવ્યો હતો. પોલીસે સ્થળ પરથી 311 પેટીમાં ભરેલી કુલ 3,732 વિદેશી દારૂની બોટલો કબજે કરી હતી.
પ્રાથમિક તપાસમાં એવી શક્યતા વ્યક્ત કરવામાં આવી રહી છે કે દારૂનો જથ્થો અન્ય સ્થળે પહોંચાડવાની તૈયારીમાં હતો. જોકે પોલીસની હાજરીની જાણ થતાં જ હેરાફેરીમાં સંકળાયેલા શખ્સો સ્થળ છોડીને ભાગી ગયા હોવાનું માનવામાં આવે છે.
આ સમગ્ર કાર્યવાહી જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ગ્રામ્ય એલસીબીના પીઆઈ જે.પી. રાવ અને તેમની ટીમે સફળતાપૂર્વક પાર પાડી હતી. જિલ્લાના વિવિધ વિસ્તારોમાં ચાલી રહેલા ગેરકાયદે દારૂના નેટવર્ક સામે પોલીસે સતત અભિયાન શરૂ રાખ્યું છે.
પોલીસે કબજે કરાયેલા દારૂની કુલ કિંમત રૂ.25,60,152 હોવાનું જણાવ્યું છે. સમગ્ર મામલે વિંછિયા પોલીસ સ્ટેશનમાં પ્રોહિબિશન એક્ટ હેઠળ ગુનો નોંધવામાં આવ્યો છે અને દારૂનો જથ્થો અહીં કોણે પહોંચાડ્યો, તેનો સપ્લાયર કોણ છે તેમજ તેની પાછળ કાર્યરત સમગ્ર નેટવર્ક સુધી પહોંચવા માટે તપાસ તેજ કરવામાં આવી છે.
પોલીસ અધિકારીઓનું કહેવું છે કે જિલ્લામાં દારૂની ગેરકાયદે હેરાફેરી સામે આવનારા દિવસોમાં પણ સઘન ચેકિંગ અને સતત દરોડાની કાર્યવાહી ચાલુ રહેશે. બુટલેગરો સામે કોઈપણ પ્રકારની ઢીલ નહીં રાખવાની સ્પષ્ટ સૂચના આપવામાં આવી છે.
